રાજકોટ : ભારતીય શેરબજારોમાં આજે, 17 જૂને, ભારે ઘટાડો જોવા મળ્યો હતો. સોમવારની તેજ ગતિ બાદ રોકાણકારોએ નફાવસૂલી કરતા બજાર ગગડ્યું હતું. કારોબાર દરમિયાન સેન્સેક્સ 419.15 અંક અથવા 0.51% ઘટીને 81,471.89ના નીચલા સ્તર સુધી પહોંચી ગયો હતો. જ્યારે નિફ્ટીમાં 136 અંક અથવા 0.54%નો ઘટાડો નોંધાયો હતો અને તે 24,846.45ના સ્તર સુધી સરકી ગયો હતો. ઇઝરાયેલ-ઈરાન વચ્ચેના વધતા તણાવની ચિંતાઓએ પણ બજાર પર દબાણ બનાવ્યું હતું. આજે મેટલ અને ફાર્મા કંપનીઓના શેરોમાં સૌથી વધુ ઘટાડો જોવા મળ્યો હતો, જ્યારે આઇટી સિવાયના તમામ સેક્ટોરલ ઇન્ડેક્સ લાલ નિશાનમાં કારોબાર કરી રહ્યા હતા.
શેરબજારમાં આજના ઘટાડાના 5 મુખ્ય કારણો:
 * ઇઝરાયેલ અને ઈરાન વચ્ચેનો સંઘર્ષ:
   ઇઝરાયેલ અને ઈરાન વચ્ચેનો સંઘર્ષ સતત પાંચમા દિવસે પણ યથાવત રહ્યો છે. આ દરમિયાન અમેરિકાના રાષ્ટ્રપતિ ડોનાલ્ડ ટ્રમ્પે પણ તમામ નાગરિકોને ઈરાનની રાજધાની તેહરાન ખાલી કરવાની ચેતવણી આપી છે. ટ્રમ્પે જણાવ્યું કે ઈરાને પરમાણુ કરારો પર તેમની ઓફર કરેલી ડીલ પર હસ્તાક્ષર કર્યા નથી, જેનું તેને પરિણામ ભોગવવું પડશે. ઘણા મીડિયા રિપોર્ટ્સમાં એવી સંભાવના પણ વ્યક્ત કરવામાં આવી છે કે ઇઝરાયેલના સમર્થનમાં અમેરિકાની ભાગીદારી થઈ શકે છે, જેનાથી પશ્ચિમ એશિયામાં સ્થિતિ વધુ બગડી શકે છે. HDFC સિક્યોરિટીઝના પ્રાઇમ રિસર્ચ હેડ, દેવર્ષ વકીલે જણાવ્યું કે, "રાષ્ટ્રપતિ ટ્રમ્પના તેહરાન પરના નિવેદન બાદ ભૂ-રાજકીય તણાવથી બજાર પર દબાણ વધ્યું છે."
 * નબળા વૈશ્વિક સંકેતો:
   એશિયન બજારોમાં નબળાઈથી પણ બજારના સેન્ટિમેન્ટ પર અસર પડી હતી. ભારતીય શેરબજારમાં કારોબાર શરૂ થતા પહેલા સાઉથ કોરિયાનો કોસ્પી, શાંઘાઈનો SSE કમ્પોઝિટ અને હોંગકોંગનો હેંગસેંગ ઇન્ડેક્સ લાલ નિશાનમાં કારોબાર કરી રહ્યા હતા. આ સાથે જ અમેરિકી શેરબજારોના ફ્યુચર્સ પણ નબળી શરૂઆતનો સંકેત આપી રહ્યા હતા.
 * ક્રૂડ ઓઇલની કિંમતોમાં ઉછાળો:
   આંતરરાષ્ટ્રીય બજારમાં બ્રેન્ટ ક્રૂડનો ભાવ 0.53% વધીને $73.62 પ્રતિ બેરલ પર પહોંચી ગયો હતો. અમેરિકા દ્વારા યુરોપમાં પોતાની સૈન્ય શક્તિઓને મજબૂત કરવા અને રાષ્ટ્રપતિ ટ્રમ્પના G7 શિખર સંમેલનની પોતાની યાત્રાને અધવચ્ચેથી સમાપ્ત કરવાની ખબરોએ પણ બજારમાં સાવચેતી વધારી. ક્રૂડ ઓઇલની ઊંચી કિંમતો ભારત જેવા તેલ આયાતકાર દેશો માટે નકારાત્મક માનવામાં આવે છે.
 * વિદેશી રોકાણકારોની વેચવાલી:
   સોમવારે વિદેશી સંસ્થાકીય રોકાણકારો (FIIs) એ ભારતીય શેરબજારમાંથી ₹2,539.42 કરોડની શુદ્ધ વેચવાલી કરી હતી, જેનાથી બજાર પર વધારાનું દબાણ આવ્યું હતું.
 * ફેડરલ રિઝર્વના નિર્ણયની રાહ:
   અમેરિકી ફેડરલ રિઝર્વની વ્યાજ દરોને લઈને યોજાઈ રહેલી બેઠકના કારણે પણ આજે રોકાણકારોનો અભિગમ સાવચેતીભર્યો રહ્યો હતો. આ બેઠકના પરિણામો ભારતીય સમયાનુસાર આજે મોડી રાત સુધીમાં આવવાની અપેક્ષા છે. ચોઇસ બ્રોકિંગના એનાલિસ્ટ હાર્દિક મટાલિયાએ જણાવ્યું, "વૈશ્વિક અનિશ્ચિતતા વચ્ચે રોકાણકારો સાવચેત બન્યા છે અને અમેરિકી ફેડરલ રિઝર્વના આગામી નિર્ણયમાંથી નીકળનારા સંકેતોની રાહ જોઈ રહ્યા છે."
શું આગળ વધુ ઘટાડો શક્ય છે?
Geojit ઇન્વેસ્ટમેન્ટ્સના ચીફ માર્કેટ સ્ટ્રેટેજિસ્ટ આનંદ જેમ્સના મતે, "અમને વિશ્વાસ નથી કે ગત શુક્રવારે લોઅર બોલિંજર બેન્ડમાંથી મળેલી તેજી લાંબા સમય સુધી ટકી શકશે. અમને કારોબાર 24500 થી 24832ની વચ્ચે સીમિત રહેવાની અપેક્ષા છે. જો કન્સોલિડેશન પછી નિફ્ટી 24,832/24,888ને પાર નહીં કરી શકે તો તેમાં 24,060 સુધીનો ઘટાડો જોવા મળી શકે છે."