<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 18th June 2025

અમેરિકામાં પાકિસ્‍તાનીઓએ પાક. આર્મી ચીફનો હુરિયો બોલાવ્‍યો

અસીમ મુનીરને ‘માસ મર્ડરર' ગણાવી આકરો વિરોધ દર્શાવ્‍યો

વોશિંગ્‍ટન,તા.૧૮: અમેરિકા ગયેલા પાકિસ્‍તાનના આર્મી ચીફ અસીમ મુનીરને વિરોધનો સામનો કરવો પડી રહ્યો છે. મુનીરને ‘પાકિસ્‍તાનીઓના હત્‍યારા, ઇસ્‍લામાબાદના હત્‍યારા' અને ‘માસ મર્ડરર' ગણાવવામાં આવ્‍યા છે. મુનીરના વિરોધની આ ઘટના વોશિંગ્‍ટનમાં બની છે, જેનો વીડિયો સોશિયલ મીડિયા પર વાયરલ થઈ રહ્યો છે.

વીડિયોમાં જોઇ શકાય છે કે પાકિસ્‍તાનના નાગરિકો મુનીરની હોટલની સામે વિરોધ પ્રદર્શન કરવા એકત્ર થયા છે. ત્‍યાં વાહનો પર પ્રોજેક્‍ટર પર મુનીરને માસ મર્ડરર ગણાવવામાં આવી રહ્યા છે. ખાસ વાત એ છે કે મુનીરનો વિરોધ કરનાર લોકો પણ પાકિસ્‍તાનના જ છે, જે અમેરિકામાં રહે છે. મીડિયા અહેવાલ મુજબ, મુનીરના વિરોધ પ્રદર્શન માટેનો કાર્યક્રમ પાકિસ્‍તાન તહરીક-એ-ઇન્‍સાફ(પીટીઆઈ)ના સમર્થકો દ્વારા યોજવામાં આવ્‍યો હતો. સોશ્‍યલ મીડિયા પર વાયરલ વીડિયોમાં એ પણ જોઈ શકાય છે કે મુનીરની સામે પ્રદર્શનકારી ‘અસીમ મુનીર, તુમ કાયર હો', ‘તુમ્‍હે શર્મ આની ચાહિએ', માસ મર્ડરર' અને ‘તુમ્‍હેં શર્મ આની ચાહિએ, તાનાશાહ' અને ‘પાકિસ્‍તાન કે કાતિલ' જેવા નારા લગાવ્‍યા હતા. એક બિલ્‍ડિંગમાંથી બહાર નીકળતી વખતે અસીમ મુનીરની સામે લોકોએ આ સૂત્રોચ્‍ચાર કર્યા હતા. વાયરલ વીડિયોમાં લોકોને અધિકારીઓ સાથે તકરાર કરતાં પણ જોઈ શકાય છે. કારણ કે સુરક્ષા અધિકારીઓ લોકોને પરિસરમાં જવાથી રોકી રહ્યા હતા.

પાકિસ્‍તાનના આર્મી ચીફ મુનીરની અમેરિકાની યાત્રાની જાહેરાત પર પહેલા પૂર્વ વડાપ્રધાન ઈમરાનખાનની પીટીઆઈએ વોશિંગ્‍ટનમાં પાકિસ્‍તાન દૂતાવાસની બહાર વિરોધ પ્રદર્શનનું આહ્વાન કર્યું હતું. ઉલ્લેખનીય છે કે પાકિસ્‍તાનના આર્મી ચીફ રવિવારે પાંચ દિવસીય સત્તાવાર યાત્રા પર અમેરિકા ગયા છે. તેમનો ઉદ્દેશ્‍ય અમેરિકાની સાથે સૈન્‍ય અને વ્‍યૂહાત્‍મક સંબંધો મજબૂત કરવાનો છે. તાજેતરમાં ભારત સાથે સૈન્‍ય ટકરાવ પછી મુનીરને પાકિસ્‍તાનમાં પ્રમોશન પણ મળ્‍યું છે.

(4:11 PM IST)