પુણે : મહારાષ્ટ્રના પુણે શહેરમાં બુધવારની રાત માર્ગ અકસ્માતો માટે કાળ બનીને આવી હતી. બે અલગ-અલગ ઘટનાઓમાં કુલ ૭ લોકોના કરૂણ મોત થયા હતા, જ્યારે ૩૧ લોકો ઘાયલ થયા હતા. આ ઘટનાઓથી પુણે સહિત સમગ્ર મહારાષ્ટ્રમાં ભારે ચકચાર મચી ગઈ છે.
પ્રથમ અને વધુ ગંભીર અકસ્માત પુણેના જેજુરી-મોરગાંવ રોડ પર બન્યો હતો. અહીં એક તેજ રફ્તાર સેડાન કાર અને પિકઅપ ટ્રક વચ્ચે ભીષણ ટક્કર થઈ હતી, જેના પરિણામે ૭ લોકોએ સ્થળ પર જ જીવ ગુમાવ્યા હતા. પુણે ગ્રામીણના એસપી સંદીપ સિંહ ગીલે આ ઘટના અંગે માહિતી આપી હતી. અકસ્માત એટલો ભયાનક હતો કે વાહનોના કચ્ચરઘાણ નીકળી ગયા હતા અને મૃતદેહોને બહાર કાઢવા માટે ભારે જહેમત ઉઠાવવી પડી હતી.
બીજી ઘટના મુંબઈ-પુણે એક્સપ્રેસવે પર બની હતી, જ્યાં ગેરકાયદેસર પ્રવાસીઓને લઈને જઈ રહેલું એક પોલીસ વાહન પલટી ગયું હતું. આ વાહનમાં ૧૬૦ ગેરકાયદેસર બાંગ્લાદેશી પ્રવાસીઓ સવાર હતા, જેમને મુંબઈમાં ગેરકાયદેસર રીતે રહેતા હોવાથી પુણે એરપોર્ટથી ડિપોર્ટ કરવા માટે રાયગઢથી પુણે લઈ જવામાં આવી રહ્યા હતા. આ અકસ્માતમાં ૧૯ પોલીસકર્મી અને ૧૨ બાંગ્લાદેશી નાગરિકો ઘાયલ થયા હતા. તમામ ઘાયલોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા છે.
પુણેમાં એક જ રાતમાં બનેલા આ બે મોટા અકસ્માતોને કારણે તંત્ર દોડતું થયું છે. પોલીસે બંને ઘટનાસ્થળો પર પહોંચીને તપાસ હાથ ધરી છે અને અકસ્માતોના ચોક્કસ કારણો જાણવા માટે કાર્યવાહી શરૂ કરી છે. આ ઘટનાઓએ ફરી એકવાર માર્ગ સુરક્ષાના મુદ્દાને ધ્યાન પર લાવ્યો છે.