ફતેહપુર,તા.૧૯: ઉત્તર પ્રદેશના ફતેહપુરમાંથી એક ચોંકાવનારી ઘટના સામે આવી છે. આ ઘટનામાં મંદિરમાં કેટલાક ભક્‍તોએ પૂજારીને માર માર્યો હતો. મંદિર પરિસરમાં ભક્‍તો એક મંદિરના પૂજારીને માર મારતા જોવા મળતા સીસીટીવી ફૂટેજ સામે આવ્‍યા છે. ફૂટેજ મુજબ આ ઘટના ૧૫ જૂનના રોજ સવારે ૮:૩૦ વાગ્‍યે બની હતી, જ્‍યારે પૂજારી પ્રસાદ ચઢાવી રહ્યા હતા.

આ સમય દરમિયાન, એક ભક્‍ત પ્રસાદમાંથી બે વધારાના લાડુ લેવા બદલ પૂજારી પર ગુસ્‍સે થયો હોવાના અહેવાલ છે. પૂજારી અને લોકો વચ્‍ચે વિવાદ થયો હતો અને તે ઝઘડો ટૂંક સમયમાં વધી ગયો અને હિંસક બની ગયો. લોકોએ પૂજારી પર હુમલો કર્યો અને તે કઈ બોલે તે પહેલા જ લોકોએ તેના વાળ ખેંચ્‍યા અને પછી મુક્કા અને લાફા મારવાનું શરૂ કર્યું.

૬૫ સેકન્‍ડના આ વીડિયો ક્‍લિપમાં એક પુરુષ પૂજારીને પકડી રાખે છે જ્‍યારે બીજા પુરુષ તેને માર મારી રહ્યા છે. કેટલીક મહિલાઓ દરમિયાનગીરી કરીને પુરુષોને પૂજારી પર હુમલો કરતા રોકવાનો પ્રયાસ કરતી જોઈ શકાય છે, પરંતુ તેમના પ્રયાસો નિરર્થક રહી.

સોશિયલ મીડિયા પ્‍લેટફોર્મ X પર વાયરલ થયેલા વીડિયો પર ફતેહપુર પોલીસે પ્રતિક્રિયા આપી છે. આ કિસ્‍સામાં, ખાગા પોલીસ સ્‍ટેશનમાં મળેલી લેખિત માહિતીના આધારે, સંબંધિત કલમો હેઠળ કેસ નોંધીને નિયમો અનુસાર જરૂરી કાનૂની કાર્યવાહી કરવામાં આવી રહી છે, પોલીસે X પર જણાવ્‍યું. (૪૦.૭)