નવી દિલ્‍હી, તા. ૧૯: કોવિડ-૧૯ ચેપનો નવો પ્રકાર હવે નબળો પડી રહ્યો છે. આને કારણે, ચેપના સક્રિય કેસોમાં સતત ઘટાડો થયો છે. આ સામાન્‍ય લોકો અને સરકાર માટે મોટી રાહત છે. હાલમાં, ભારતમાં કોવિડ ચેપના સક્રિય કેસ ઘટીને ૬ હજારથી નીચે આવી ગયા છે. કેન્‍દ્રીય આરોગ્‍ય મંત્રાલયે ૧૯ જૂનના રોજ સવારે ૮ વાગ્‍યા સુધી કોવિડ અંગેનો ડેટા જાહેર કર્યો હતો. આરોગ્‍ય મંત્રાલયના જણાવ્‍યા અનુસાર, દેશભરમાં ચેપના ૫૦૭ કેસનો ઘટાડો થયો છે.આ સાથે, કુલ સક્રિય કેસ ઘટીને ૫૯૭૬ થઈ ગયા છે. ગુરુવારે, કર્ણાટકમાં સૌથી મોટો ઘટાડો નોંધાયો હતો, જ્‍યાં ચેપના ૧૮૭ કેસ ઘટયા હતા.

આરોગ્‍ય મંત્રાલયે માહિતી આપી હતી કે છેલ્લા ૨૪ કલાકમાં, કર્ણાટક ઉપરાંત, રાજસ્‍થાનમાં ૮૩, કેરળમાં ૭૫, ગુજરાતમાં ૫૯, મહારાષ્‍ટ્રમાં ૪૬, ઉત્તર પ્રદેશમાં ૧૮ અને આંધ્ર પ્રદેશમાં ૧૩ સક્રિય કેસ ઘટયા છે. હરિયાણામાં ૯, મધ્‍યપ્રદેશમાં ૭, ઝારખંડમાં ૬, બિહારમાં ૩, જમ્‍મુ અને કાશ્‍મીરમાં ૨ અને તેલંગાણા અને છત્તીસગઢમાં એક-એક કેસ ઓછા થયા છે. ૨૪ કલાકમાં ચેપના કેસ ઘટયા બાદ, કેરળમાં કુલ સક્રિય કેસની સંખ્‍યા હવે ૧૩૦૯ છે. હાલમાં ગુજરાતમાં ૧૦૪૬ સક્રિય કેસ છે.