ઇઝરાયલે અનેક ઇરાની લક્ષ્યો પર હુમલો કર્યો. આમાં ઇરાનના પરમાણુ માળખા, મિસાઇલ ઉત્પાદન સ્થળ અને હવાઈ સંરક્ષણ પ્રણાલીનો સમાવેશ થાય છે. ઇઝરાયલે ઇરાનના અરાક હેવી વોટર રિએક્ટરને પણ નષ્ટ કરી દીધું.

ઇઝરાયલી સંરક્ષણ દળે જણાવ્યું હતું કે આ કામગીરી માટે 40 ફાઇટર એરક્રાફ્ટ તૈનાત કરવામાં આવ્યા હતા. ઇઝરાયલે 100થી વધુ બોમ્બ ફેંકીને અરાક હેવી વોટર રિએક્ટર અને નાતાન્ઝ નજીક પરમાણુ શસ્ત્ર વિકાસ સંબંધિત સુવિધાનો નાશ કર્યો હતો.
અરાક રિએક્ટરનું બાંધકામ સૌપ્રથમ 1997માં શરૂ થયું હતું. પરંતુ તે ફક્ત આંશિક રીતે બનાવવામાં આવ્યું હતું. જ્યારે 2015માં સંયુક્ત વ્યાપક કાર્ય યોજના પર સંમતિ થઈ હતી, ત્યારે ઇરાને કહ્યું હતું કે તે પ્લુટોનિયમના ઉત્પાદનમાં તેનો ઉપયોગ કરશે નહીં. અરાક રિએક્ટર કાર્યરત નથી, પરંતુ ઇઝરાયલે હવે તેનો અવકાશ સમાપ્ત કરી દીધો છે.

ઈરાનની રાજધાની તેહરાનથી 280 કિમી દૂર સ્થિત આ રિએક્ટરમાં કોઈ પરમાણુ સામગ્રી નહોતી, તેથી તેનાથી રેડિયોલોજિકલ અસર થવાની કોઈ શક્યતા નથી. આંતરરાષ્ટ્રીય પરમાણુ ઉર્જા એજન્સીએ પણ ઈરાનના સ્થળો પર હુમલાની પુષ્ટિ કરી છે.

આ ઉપરાંત, ઇઝરાયલે તહેરાન, ઇસ્ફહાન, શિરાઝ અને કરમાનશાહ પર પણ હુમલો કર્યો હતો. ઇઝરાયલે દાવો કર્યો છે કે નતાન્ઝ નજીક પરમાણુ શસ્ત્રો માટે અનન્ય ઘટકો અને ઉપકરણોના વિકાસ માટેના પ્રોજેક્ટ્સ ચાલી રહ્યા હતા, જેને ઇઝરાયલે પણ નષ્ટ કરવા માટે હુમલો કર્યો હતો.

ઇઝરાયલે સ્પષ્ટ કર્યું છે કે જ્યાં સુધી જરૂર પડે ત્યાં સુધી આ કાર્યવાહી ચાલુ રહેશે. ઇઝરાયલી લશ્કરી અધિકારી બ્રિગેડિયર જનરલ એફી ડેફ્રીને કહ્યું કે અમારું લક્ષ્ય ઇઝરાયલના અસ્તિત્વ માટેના ખતરાને ઘટાડવાનું છે.