જેરૂસલેમ: ઇઝરાયેલે ઈરાનની ફોર્ડો ન્યુક્લિયર સાઇટને નિશાન બનાવવાની ચીમકી આપી છે. ઇઝરાયેલે જાહેર કર્યું છે કે, જો અમેરિકાએ આ હુમલામાં સાથ ન આપ્યો, તો પણ તેઓ એકલા હાથે આ પગલું ભરશે. આ જાહેરાતથી આંતરરાષ્ટ્રીય રાજકારણમાં ખળભળાટ મચી ગયો છે.

ઈરાનની ફોર્ડો ન્યુક્લિયર સાઇટ પહાડની અંદર ઊંડાણમાં આવેલી છે, જેને નષ્ટ કરવા માટે જીબીયુ–૫૭ બંકર-બસ્ટર બોમ્બની જરૂર છે. આ બોમ્બ અને તેને લઈ જઈ શકે તેવું વિમાન ફક્ત અમેરિકા પાસે જ છે. આ સ્થિતિમાં ઇઝરાયેલની આ ચીમકી બે શક્યતાઓ ઉભી કરે છે: (૧) જમીની હુમલો, જે ઇઝરાયેલ માટે વિનાશકારી બની શકે છે, અથવા (૨) પરમાણુ હુમલો, જે આખી દુનિયા માટે ભયંકર પરિણામો લાવી શકે છે.

અમેરિકી રાષ્ટ્રપતિ જો બાઇડેને ઈરાનની ન્યુક્લિયર સાઇટ્સ પર હુમલાને સમર્થન નહીં આપવાનું નિવેદન આપ્યું હતું, જેનાથી ઇઝરાયેલના આ નિર્ણયને વધુ જટિલ બનાવ્યો છે. બીજી તરફ, ઇઝરાયેલના વડાપ્રધાન બેન્જામિન નેતન્યાહુએ ઈરાનને "અસ્તિત્વનો ખતરો" ગણાવ્યું છે અને જણાવ્યું કે, ઈરાનની ન્યુક્લિયર સંસાધનોને રોકવા માટે તેઓ કોઈપણ હદ સુધી જશે.

ઈરાનની ફોર્ડો સાઇટને લઈ ઇઝરાયેલની આ ચીમકીને "મધ્ય પૂર્વમાં નવા યુદ્ધની શરૂઆત" તરીકે ગણાવાવમાં આવી રહેલ છે અને જો હુમલો થયો તો તેલના ભાવમાં ભારે ઉછાળો આવી શકે છે, જેની સીધી અસર ભારત જેવા દેશો પર પડશે.

• ઈરાનના પરમાણુ કાર્યક્રમને લઈ ઇઝરાયેલના આ પગલાને "છેલ્લી ઘડીનો નિર્ણય" ગણાવાઈ રહ્યો છે. ઈરાને પોતાના યુરેનિયમ સંવર્ધનને લગભગ હથિયાર-ગ્રેડ સ્તરે પહોંચાડ્યું છે, જે ઇઝરાયેલ માટે ગંભીર ખતરો છે.

• એક અહેવાલ મુજબ ઇઝરાયેલનું આ પગલું યુનાઇટેડ નેશન્સ અને અન્ય આંતરરાષ્ટ્રીય સંસ્થાઓના નિયમોનું ઉલ્લંઘન ગણાઈ શકે છે, જેનાથી વૈશ્વિક સ્તરે તેમની ટીકા થઈ શકે છે.

નિષ્ણાતોનું માનવું છે કે, ઇઝરાયેલનો આ નિર્ણય મધ્ય પૂર્વની રાજકીય સ્થિતિને વધુ અસ્થિર કરી શકે છે. ઈરાનના રિવોલ્યુશનરી ગાર્ડ્સ અને સૈન્યના નેતાઓ પર થયેલા હુમલાઓએ પહેલેથી જ ઈરાનને રોષે ભરાયું છે. જો ઇઝરાયેલે ફોર્ડો પર હુમલો કર્યો, તો ઈરાનનો પ્રતિકાર યુદ્ધનું રૂપ લઈ શકે છે, જેની અસર આખા વિશ્વ પર પડશે.

ઇઝરાયેલની આ ચીમકીએ વૈશ્વિક સ્તરે ચિંતા વધારી છે. અમેરિકા અને ઇઝરાયેલ વચ્ચેના મતભેદો આ મામલે કેવી રીતે ઉકેલાય છે, તેના પર દુનિયાની નજર રહેશે.