ઇઝરાયલ અને ઈરાન વચ્ચે યુદ્ધ હાલ ખતમ થવાની કોઈ શક્યતા નથી. ઇઝરાયલે શનિવારે કહ્યું હતું કે તે લાંબા યુદ્ધની તૈયારી કરી રહ્યું છે. ઇઝરાયલી સેનાનો દાવો છે કે તેણે રાત્રે ઈરાનના ઇસ્ફહાન પરમાણુ મથકને નિશાન બનાવ્યું હતું. આ હુમલામાં તેહરાનના ઓછામાં ઓછા ત્રણ વરિષ્ઠ કમાન્ડર માર્યા ગયા હતા.

   ઇસ્ફહાનના સુરક્ષા બાબતોના ડેપ્યુટી ગવર્નર અકબર સાલેહીએ પણ પુષ્ટિ આપી છે કે ઇઝરાયલે પરમાણુ સંશોધન સુવિધાને નુકસાન પહોંચાડ્યું છે. જોકે, તેમણે કોઈ જાનહાનિ થયાનું કહ્યું નથી. તમને જણાવી દઈએ કે ઇઝરાયલી સેનાએ બીજી વખત ઇસ્ફહાન પરમાણુ મથકને નિશાન બનાવ્યું છે. યુદ્ધ શરૂ થયાના 24 કલાકની અંદર ઇઝરાયલે આ મથકને પહેલાથી જ નિશાન બનાવી લીધું છે

   ઇઝરાયલ કહે છે કે તે ઈરાનની પરમાણુ ક્ષમતાને સંપૂર્ણપણે નષ્ટ કરવા માંગે છે. ઇઝરાયલે ફરી એકવાર ઈરાન પર હુમલો કર્યો. દક્ષિણ-પશ્ચિમ વિસ્તારોમાં બોમ્બમારાનો અવાજ સંભળાયો. ઈરાને ફરી એકવાર ડ્રોન અને મિસાઈલ હુમલાઓ પણ શરૂ કર્યા. ઉત્તર ઇઝરાયલમાં બે માળની ઇમારત પર ડ્રોન હુમલો કરવામાં આવ્યો. આ ઇમારત નાશ પામી છે.  

   ઇઝરાયલી અધિકારીઓ કહે છે કે ઈરાન તરફથી થતા હુમલાઓ આકાશમાં જ રોકી દેવામાં આવે છે. તેમના માટે ઇઝરાયલ પર હુમલો કરવો ખૂબ મુશ્કેલ છે. તેમણે એમ પણ કહ્યું કે એ વાતનો ઇનકાર કરી શકાય નહીં કે ઈરાન પાસે શક્તિ નથી. આજે ઈરાનના વિદેશ મંત્રી અબ્બાસ અરાઘચીએ કહ્યું કે જો અમેરિકા પણ આ યુદ્ધમાં જોડાય છે, તો તે બધા માટે ખૂબ જ ખતરનાક બનશે 

   13 જૂને ઈઝરાયલે અચાનક ઈરાનના લશ્કરી અને પરમાણુ ઠેકાણાઓ પર હુમલો કર્યો હતો. આ હુમલામાં ઈરાનના ઘણા ટોચના કમાન્ડર અને પરમાણુ વૈજ્ઞાનિકો પણ માર્યા ગયા હતા. આ પછી ઈરાને પણ ઈઝરાયલ પર હુમલા શરૂ કર્યા હતા. ઈરાનના આરોગ્ય મંત્રાલયનું કહેવું છે કે ઈઝરાયલી હુમલામાં ઓછામાં ઓછા 400 લોકો માર્યા ગયા છે. તે જ સમયે, 3 હજારથી વધુ લોકો ઘાયલ થયા છે. ઈરાન સમર્થિત હુતી બળવાખોરોએ ધમકી આપી છે કે જો ટ્રમ્પ વહીવટીતંત્ર ઈરાન વિરુદ્ધ ઈઝરાયલના લશ્કરી અભિયાનમાં જોડાશે, તો તેઓ લાલ સમુદ્રમાં અમેરિકન જહાજો અને યુદ્ધ જહાજો પર ફરીથી હુમલાઓ શરૂ કરશે.