નવી દિલ્‍હીઃ દેશના સૌથી લાંબા એક્સપ્રેસવેમાં સામેલ દિલ્હી-મુંબઇ એક્સપ્રેસવેનું 1,386 કિમી લંબાઈવાળું કામ ઝડપથી આગળ વધી રહ્યું છે. આ 8-લેનના એક્સપ્રેસવેનો મોટો ભાગ ગુજરાતમાંથી પણ પસાર થાય છે. ખાસ કરીને વડોદરા-સુરત સેક્શનનું કામ હવે અંતિમ તબક્કે છે અને મુસાફરો તેની શરૂઆતની આતુરતાથી રાહ જોઈ રહ્યા છે.

વડોદરા-ભરૂચ વચ્ચેના પેકેજ 1થી 3 પહેલાથી કાર્યરત છે. નેશનલ હાઇવે ઓથોરિટી ઓફ ઇન્ડિયા (NHAI) ના તાજેતરના ડેટા મુજબ, 1 એપ્રિલ 2025 સુધીમાં પેકેજ 4 અને પેકેજ 6નું નિર્માણ પણ પૂર્ણ થઈ ગયું છે. જોકે, પેકેજ 5નું કામ હજુ ચાલુ છે અને તે વડોદરા-સુરત સેક્શનના પૂર્ણ ઉદઘાટન માટે એકમાત્ર અવરોધ તરીકે ઊભું છે.

પેકેજ 6, જે એનાથી કીમ સુધી 36.93 કિમીનું અંતર આવરી લે છે, તેને આ વર્ષે જાન્યુઆરીમાં પ્રોવિઝનલ કમ્પ્લીશન સર્ટિફિકેટ (PCC) મળ્યું હતું. છતાં પણ જમીન પર થોડું કામ હજુ બાકી છે. ઇન્ફ્રાસ્ટ્રક્ચર બ્લોગર્સના રિપોર્ટ મુજબ, આ સંપૂર્ણ એક્સપ્રેસવેનો મોટાભાગનો ભાગ મુસાફરી માટે તૈયાર જોવા મળે છે.

મુખ્ય પેન્ડિંગ કામ તાપી નદી પરના પુલ સાથે સંકળાયેલું છે, જે આ સંપૂર્ણ સેક્શનનું મહત્વપૂર્ણ માળખું છે. પુલનો એક ભાગ પૂર્ણ થઈ ચૂક્યો છે, જ્યારે બીજા ભાગમાં પણ મોટા ભાગનું કામ, જેમ કે ગર્ડર લોન્ચિંગ પૂરું થઈ ગયું છે. હવે માત્ર પુલને રસ્તા સાથે જોડવાનું અને લેન માર્કિંગનું કામ બાકી છે.

સૂત્રોના જણાવ્યા મુજબ, પુલનું લગભગ 80%થી વધુ કામ પૂર્ણ થઈ ચૂક્યું છે અને હવે અંતિમ તબક્કાનું કાર્ય ચાલી રહ્યું છે. આવી સ્થિતિમાં, આખું સેક્શન ટૂંક સમયમાં શરૂ થવાની પૂરી શક્યતા છે.

કીમ ઇન્ટરચેન્જ નજીક હાલ લેન માર્કિંગ, ક્રેશ બેરિયર ઇન્સ્ટોલેશન અને હોર્ડિંગ્સ જેવા ફિનિશિંગ કામ હજુ બાકી છે. જો કે, અહીંનો ટોલ પ્લાઝા તૈયાર છે અને મોટા પ્રમાણમાં બાંધકામ પૂરું થઈ ચૂક્યું છે. હવે માત્ર નાના ફિનિશિંગ કામ જ બાકી છે, અને એકવાર આ પૂરું થઈ જાય, ત્યારબાદ NH-48 અને NH-53ને જોડતો આ 40 કિમી લાંબો માર્ગ જાહેર ઉપયોગ માટે ખુલ્લો મુકવામાં આવશે.

હાલમાં ચોમાસાની ઋતુ શરૂ થવાના કારણે ખાસ કરીને પુલ અને ઇન્ટરચેન્જ જેવા વિસ્તારોમાં બાંધકામ ધીમી ગતિએ થઈ શકે છે. જેના કારણે દિલ્હી-મુંબઇ એક્સપ્રેસવેના વડોદરા-સુરત વિભાગના સંપૂર્ણ ઉદઘાટનમાં વિલંબ થવાની શક્યતા છે. તેમ છતાં, જો ચોમાસા પછી કામ ઝડપથી પુનઃપ્રારંભ થાય, તો દિવાળીની આસપાસ અથવા 2025 ના અંત સુધીમાં આ માર્ગને ખુલ્લો મૂકવાની અપેક્ષા રાખી શકાય છે.