લખનૌ : સમાજવાદી પાર્ટી (સપા) એ તેના ત્રણ ધારાસભ્યોને પાર્ટી વિરોધી ગતિવિધિઓમાં સામેલ થવાના આરોપસર પક્ષમાંથી બહારનો રસ્તો બતાવી દીધો છે. સપામાંથી હાંકી કઢાયેલા ધારાસભ્યોમાં ગોસાઈગંજના ધારાસભ્ય અભય સિંહ, ગૌરીગંજથી રાકેશ પ્રતાપ સિંહ અને ઊંચાહારથી મનોજ કુમાર પાંડેનો સમાવેશ થાય છે.

રાજ્યસભા ચૂંટણીમાં ક્રોસ વોટિંગનો મામલો: દોઢ વર્ષ બાદ કાર્યવાહી

છેલ્લા કેટલાક સમયથી આ ત્રણેય ધારાસભ્યો ભાજપના પક્ષમાં જોવા મળી રહ્યા હતા. ખાસ કરીને, ફેબ્રુઆરી 2024માં યોજાયેલી રાજ્યસભા ચૂંટણીમાં તેમણે સપાના બદલે ભાજપ સમર્થિત ઉમેદવારને મત આપ્યો હતો. ત્યારથી જ તેઓ પાર્ટીના રડાર પર હતા. લગભગ દોઢ વર્ષના લાંબા સમયગાળા બાદ આ 'બાગી' ધારાસભ્યો પર કાર્યવાહી કરવામાં આવી છે.

પાર્ટીએ તેમને નિષ્કાસિત કરતા જણાવ્યું છે કે, "હૃદય પરિવર્તન માટે આપવામાં આવેલી અનુગ્રહ અવધિ સમાપ્ત થઈ ગઈ છે... બાકીના (ધારાસભ્યો) ની સમયસીમા સારા વર્તનને કારણે બાકી છે, ભવિષ્યમાં પણ જન વિરોધી લોકો માટે પાર્ટીમાં કોઈ સ્થાન રહેશે નહીં."

સપાની કટિબદ્ધતા: સિદ્ધાંતો સાથે કોઈ સમજૂતી નહીં

સપાનું કહેવું છે કે તેના આ નિર્ણયથી તેની વિચારધારા અને સિદ્ધાંતો જાળવી રાખવાની પ્રતિબદ્ધતા પ્રતિબિંબિત થાય છે. પાર્ટીનો ઉદ્દેશ તેના સમર્થકો અને સામાન્ય જનતા વચ્ચે તેની વિશ્વસનીયતા અને પ્રતિષ્ઠા જાળવી રાખવાનો છે.

ઉલ્લેખનીય છે કે, ફેબ્રુઆરી 2024માં રાજ્યસભાની 10 બેઠકો માટે ભાજપે 8 ઉમેદવાર અને સપાએ 3 ઉમેદવાર ઉતાર્યા હતા. સમાજવાદી પાર્ટીના ધારાસભ્યો દ્વારા કરાયેલા ક્રોસ વોટિંગના કારણે ભાજપના આઠમા ઉમેદવાર સંજય શેઠને જીત મળી હતી. જ્યારે, સપાના ફક્ત બે ઉમેદવારો જયા બચ્ચન અને રામજીલાલ સુમન જ જીતી શક્યા હતા, અને ત્રીજા ઉમેદવાર આલોક રંજન હારી ગયા હતા.

સમાજવાદી પાર્ટીના 7 ધારાસભ્યો અને સુભાસપાના એક ધારાસભ્યએ ક્રોસ વોટિંગ કર્યું હતું, જેમાં રાકેશ પ્રતાપ સિંહ, અભય સિંહ અને મનોજ પાંડે ઉપરાંત રાકેશ પાંડે, વિનોદ ચતુર્વેદી, પૂજા પાલ અને આશુતોષ મૌર્ય પણ સામેલ હતા. પાર્ટીએ દોઢ વર્ષ બાદ રાકેશ પ્રતાપ સિંહ, અભય સિંહ અને મનોજ પાંડેને પાર્ટીમાંથી હાંકી કાઢ્યા છે. હજુ રાકેશ પાંડે, વિનોદ ચતુર્વેદી, પૂજા પાલ અને આશુતોષ મૌર્યને સારા વર્તનને કારણે અલ્ટીમેટમ આપીને કોઈ કાર્યવાહી કરવામાં આવી નથી.

સપાએ પાર્ટીમાંથી બહાર કઢાયેલા ધારાસભ્યો પર સાંપ્રદાયિક અને વિભાજનકારી રાજનીતિને પ્રોત્સાહન આપવા અને ખેડૂત, મહિલા, યુવા અને કારોબારી વિરોધી નીતિઓનું સમર્થન કરવાનો આરોપ મૂક્યો છે. પાર્ટીએ સ્પષ્ટ કર્યું છે કે તે તેની મૂળ વિચારધારા અને સિદ્ધાંતોની વિરુદ્ધ કોઈપણ ગતિવિધિને બરદાસ્ત કરશે નહીં. પાર્ટી વિરોધી ગતિવિધિઓમાં સામેલ થનાર દરેક સભ્ય સામે કડક કાર્યવાહી કરવામાં આવશે.

સમાજવાદી પાર્ટી અનુસાર, નિષ્કાસિત કરાયેલા ધારાસભ્યોને સુધારણાનો મોકો આપવામાં આવ્યો હતો, પરંતુ તેઓ તેમાં નિષ્ફળ રહ્યા. પાર્ટી અનુસાર, તે તેની વિચારધારા અને સિદ્ધાંતો પર કોઈ સમજૂતી કરશે નહીં અને પાર્ટીના મૂલ્યોની વિરુદ્ધ કોઈપણ ગતિવિધિને અસ્વીકાર્ય માનવામાં આવશે.

આ નિર્ણયથી સપામાં આંતરિક શિસ્ત જાળવવાનો પ્રયાસ કરવામાં આવી રહ્યો છે. શું આ કાર્યવાહી ભવિષ્યમાં આવા 'બાગી' વલણને અટકાવી શકશે?