નવી દિલ્હી : કોવિડ-19 મહામારીને કારણે લાંબા સમયથી સ્થગિત થયેલી કૈલાશ માનસરોવર યાત્રા એકવાર ફરીથી શરૂ થવા જઈ રહી છે. 5 વર્ષના લાંબા અંતરાલ બાદ, 30 જૂન 2025થી આ યાત્રાનો પ્રારંભ થશે, જેને લઈને શ્રદ્ધાળુઓમાં ભારે ઉત્સાહ જોવા મળી રહ્યો છે. જોકે, આ યાત્રા પહેલાં હંમેશા એક પ્રશ્ન ચર્ચામાં રહે છે કે, આજ સુધી કૈલાશ પર્વતના શિખર પર કોઈ કેમ ચઢી શક્યું નથી? આ યાત્રા માત્ર હિન્દુ શ્રદ્ધાળુઓ માટે જ નહીં, પરંતુ બૌદ્ધ, જૈન અને સિખ ધર્મના અનુયાયીઓ માટે પણ અત્યંત પવિત્ર અને ખાસ માનવામાં આવે છે. ચાલો જાણીએ આ યાત્રાના આ વણઉકેલ્યા રહસ્ય વિશે...

કૈલાશ પર્વતનું વણઉકેલ શિખર રહસ્ય

કૈલાશ માનસરોવર યાત્રાનું સૌથી મોટું રહસ્ય પર્વતની ચઢાઈને લઈને છે. અહીં આજ સુધી કોઈ પણ વ્યક્તિ પર્વતના શિખર સુધી પહોંચી શક્યું નથી. જાણકારી માટે જણાવી દઈએ કે, કૈલાશ પર્વતની ઊંચાઈ 6,638 મીટર છે, જ્યારે માઉન્ટ એવરેસ્ટની ઊંચાઈ 8,848 મીટર છે. આશ્ચર્યજનક વાત એ છે કે લોકો માઉન્ટ એવરેસ્ટની ચઢાઈ તો કરી લે છે, પરંતુ ઓછી ઊંચાઈ હોવા છતાં કૈલાશ પર્વતના શિખર પર કોઈ પહોંચી શક્યું નથી.

માઉન્ટ એવરેસ્ટ પર અત્યાર સુધીમાં લગભગ 7 હજારથી વધુ લોકો ચઢાઈ કરી ચૂક્યા છે, પરંતુ કૈલાશ પર્વત પર એક પણ વ્યક્તિ ચઢી શક્યો નથી. 1926માં અંગ્રેજોએ પણ અહીં ચઢાઈ કરવાનો પ્રયાસ કર્યો હતો. વળી, 2001માં એક જાપાની ટીમે પણ શિખર સુધી પહોંચવાનો નિષ્ફળ પ્રયાસ કર્યો. બંને ટીમો ખરાબ હવામાન, વિચિત્ર ઘટનાઓ અને અચાનક બીમારી વગેરે કારણોસર પાછી ફરી હતી.

વૈજ્ઞાનિકો પણ હાર્યા, અદ્રશ્ય શક્તિનો પ્રભાવ?

આ પર્વતના રહસ્યને લઈને ઘણા વૈજ્ઞાનિકોએ પણ સંશોધન કર્યા છે. જોકે, કૈલાશ પર્વતનું આ રહસ્ય આજે પણ રહસ્ય જ છે, કારણ કે કોઈ પણ વૈજ્ઞાનિક આ રહસ્યને સંપૂર્ણપણે ઉકેલી શક્યો નથી. વળી, આ પર્વત પર રિસર્ચ કરનાર હ્યુરતલીઝે જણાવ્યું કે અહીં ચઢવું અશક્ય છે.

ચઢાઈને લઈને વૈજ્ઞાનિકો ભલે મોસમી, ઇલેક્ટ્રોમેગ્નેટિક અને ભૌગોલિક પડકારોને કારણ માનતા હોય, પરંતુ ઘણા લોકો અહીં અદ્રશ્ય શક્તિનો વાસ માને છે, જે કૈલાશના એક ચોક્કસ બિંદુ પછી કોઈ પણ વ્યક્તિને શિખર સુધી જવાની પરવાનગી આપતી નથી.

ચઢાઈ પર પ્રતિબંધ

દુનિયાભરના લોકોએ કૈલાશ પર્વતને પવિત્ર સ્થળ માનતા અહીં ચઢાઈ પર રોક લગાવવાની માંગ કરી હતી. ત્યારબાદ, ધાર્મિક સંવેદનશીલતા અને પર્યાવરણ સંરક્ષણને ધ્યાનમાં રાખીને, ચીન દ્વારા 2001માં આ પર્વતની ચઢાઈ પર સંપૂર્ણપણે પ્રતિબંધ લગાવી દેવામાં આવ્યો હતો.

કૈલાશ પર્વતનું આ રહસ્ય ખરેખર રોમાંચક અને અકલ્પનીય છે. શું માન્યતાઓ પાછળ કોઈ વૈજ્ઞાનિક સત્ય છુપાયેલું છે, કે પછી તે ખરેખર કોઈ દિવ્ય શક્તિનો પ્રભાવ છે?