ઇઝરાયલ અને ઈરાન એકબીજા પર હવાઈ હુમલાઓ ઘણા સમયથી કરી જ રહ્યા છે. બંને દેશો વચ્ચે ચાલી રહેલા યુદ્ધમાં હવે અમેરિકાએ પણ એન્ટ્રી મારી લીધી છે. આ દરમિયાન નેશનલ કોન્ફરન્સ (NC) ના પ્રમુખ ફારુક અબ્દુલ્લાએ અરબ દેશોને ચેતવણી આપી છે. તેમણે કહ્યું છે કે, 'તેઓ ઇઝરાયલ અને અમેરિકાનું આગામી લક્ષ્ય હશે કારણ કે બંને દેશોની નજર તેમના તેલ અને ગેસ પર છે.' તેમણે કહ્યું, "અમેરિકાની લાંબા સમયથી ચાલતી નીતિ રહી છે કે ઈરાન પરમાણુ શક્તિ ન બને. પ્રદેશના સુન્ની દેશો પણ તેની વિરુદ્ધ છે, પરંતુ તેમની પાસે બોલવાની હિંમત નથી."

અબ્દુલ્લાએ કહ્યું, "આજે તેઓ વિચારે છે કે ઈરાન પર હુમલો થયો છે, પરંતુ હું તમારા દ્વારા તેમને ચેતવણી આપવા માંગુ છું કે એક દિવસ ઇઝરાયલ તેમના પર પણ હુમલો કરશે, કારણ કે તેઓ તેલ અને ગેસ જેવી તેમની સંપત્તિ ઇચ્છે છે. ઇઝરાયલ ફક્ત એક માસ્ક છે, અમેરિકા તેની પાછળ ઉભું છે."

પશ્ચિમ એશિયામાં ભયંકર સ્વરૂપ ધારણ કરી રહેલા યુદ્ધની અસર વિશે પૂછવામાં આવતા, જમ્મુ અને કાશ્મીરના ભૂતપૂર્વ મુખ્યમંત્રીએ કહ્યું કે આનાથી બધા દેશોની આર્થિક સ્થિતિ પર ગંભીર અસર પડશે. તેમણે કહ્યું, "મને આશા છે કે (અન્ય) વિશ્વ શક્તિઓ પરિસ્થિતિ પર નજર રાખી રહી હશે. જો આ યુદ્ધ વધશે, તો દરેક દેશની આર્થિક સ્થિતિ બરબાદ થઈ જશે. તેમણે તેને રોકવાનો પ્રયાસ કરવો જોઈએ અને હું પ્રાર્થના કરું છું કે તેઓ સફળ થાય, કારણ કે ભારતમાં પણ આપણી સ્થિતિ ખૂબ જ ખરાબ છે."

જમ્મુ અને કાશ્મીરના રાજ્યનો દરજ્જો પુનઃસ્થાપિત કરવાની પરિસ્થિતિઓ વિશે મીડિયાના એક વર્ગમાં આવેલા અહેવાલો પર પ્રતિક્રિયા આપતા, અબ્દુલ્લાએ આરોપ લગાવ્યો કે મીડિયા જૂઠાણું ફેલાવી રહ્યું છે. તેમણે કહ્યું, "તેમને (પરિસ્થિતિઓ વિશે) કોણે કહ્યું? શું કોઈએ તેમને તે જાહેર કર્યું? અહીંનું મીડિયા જૂઠાણું ફેલાવવામાં નિષ્ણાત છે, તે સત્ય કહેતું નથી. રાજ્યનો દરજ્જો જમ્મુ અને કાશ્મીરના લોકોનો અધિકાર છે. તે તેમના પર ઉપકાર નથી."