નવી દિલ્‍હી,તા.૨૪: તાજેતરના એક સર્વેમાં જાણવા મળ્‍યું છે કે દર ૨ માંથી ૧ ગ્રાહક ઓનલાઈન ઉત્‍પાદનો અને સેવાઓ ખરીદતી વખતે સુવિધા ફી ચૂકવી રહ્યો છે. વધુમાં ૭૮% ગ્રાહકોએ કહ્યું કે તેઓ એવા પ્‍લેટફોર્મ પસંદ કરશે જે આ વધારાની ફી વસૂલતા નથી. આ સર્વે લોકલસર્કલ દ્વારા હાથ ધરવામાં આવ્‍યો હતો, જેમાં ૩૨૧ જિલ્લાઓના ૪૦ હજારથી વધુ લોકોના મંતવ્‍યો લેવામાં આવ્‍યા હતા. તાજેતરમાં, એમેઝોન ઇન્‍ડિયાએ દરેક ઓર્ડર પર રૂ.૫ ની માર્કેટપ્‍લેસ ફી રજૂ કરી છે, જે પ્રાઇમ સભ્‍યપદ ધરાવતા ગ્રાહકો પર પણ લાગુ થશે. અગાઉ, બ્‍લિંકિટ, ઝેપ્‍ટો, બિગબાસ્‍કેટ, અજિયો અને ઘણી અન્‍ય કંપનીઓએ પણ આવા ચાર્જ શરૂ કર્યા છે.

ઘણી કંપનીઓ ડિલિવરી, પેકેજિંગ અથવા ન્‍યૂનતમ ઓર્ડર ન હોવા બદલ આ ફી વસૂલ કરે છે. પરંતુ આ માહિતી ગ્રાહકોને અગાઉથી સ્‍પષ્ટ રીતે જણાવવામાં આવતી નથી, જેના કારણે તેઓ ચુકવણી સમયે આ?ર્યચકિત થઈ જાય છે. રિઝર્વ બેંક ઓફ ઈન્‍ડિયા (RBI) દ્વારા ૨૦૨૨ ની માર્ગદર્શિકા અનુસાર, સુવિધા ફી સ્‍પષ્ટપણે જણાવવી જોઈએ અને તે ફક્‍ત ચોક્કસ ચુકવણી પદ્ધતિઓ પર જ લાગુ થવી જોઈએ. પરંતુ મોટાભાગની કંપનીઓ આ નિયમનું પાલન કરતી નથી. કેટલાક ગ્રાહકોએ સોશિયલ મીડિયા પર શેર કર્યું કે તેમને શાળા ફી, મોબાઇલ બિલ જેવી સેવાઓ પર રૂ.૨,૦૦૦ સુધીના વધારાના ચાર્જ ચૂકવવા પડશે, જેની તેમને પહેલા ખબર નહોતી.

૬૨% ગ્રાહકોએ કહ્યું કે ટિકિટ અથવા સેવાઓ બુક કરતી વખતે તેમને સુવિધા ફી ચૂકવવી પડી.

૫૨% લોકોએ કહ્યું કે આ ફી મોટાભાગે ઉત્‍પાદન ખરીદતી વખતે લેવામાં આવતી હતી.

૭૮% લોકોએ કહ્યું કે તેઓ એવું પ્‍લેટફોર્મ પસંદ કરવાનું પસંદ કરશે જે આ ફી વસૂલતું નથી.