<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Friday, 27th June 2025

કટ્ટરપંથીઓની માંગને પગલે બાંગ્લાદેશમાં દુર્ગા મંદિર તોડી પડાયું : ભારતે સખત વિરોધ કર્યો

ભારતે કહ્યું છે કે યુનુસ સરકારે હિન્દુઓ, તેમની મિલકતો અને ધાર્મિક સંસ્થાઓનું રક્ષણ કરવું જોઈએ: બાંગ્લાદેશની વચગાળાની સરકારે મંદિરને સુરક્ષા પૂરી પાડી નથી

નવી દિલ્હી : કટ્ટરપંથીઓની માંગને પગલે બાંગ્લાદેશમાં એક દુર્ગા મંદિર તોડી પાડવામાં આવ્યું છે. ભારતે આનો સખત વિરોધ કર્યો છે. બાંગ્લાદેશનો દાવો છે કે મંદિર ગેરકાયદેસર રીતે બનાવવામાં આવ્યું હતું અને તેણે આ પગલાનો બચાવ કર્યો છે.

ભારતે કહ્યું છે કે યુનુસ સરકારે હિન્દુઓ, તેમની મિલકતો અને ધાર્મિક સંસ્થાઓનું રક્ષણ કરવું જોઈએ. વિદેશ મંત્રાલયના પ્રવક્તા રણધીર જયસ્વાલે કહ્યું કે બાંગ્લાદેશની વચગાળાની સરકારે મંદિરને સુરક્ષા પૂરી પાડી નથી.

કટ્ટરપંથીઓ ઢાકામાં સ્થિત આ દુર્ગા મંદિરને તોડી પાડવાની માંગ કરી રહ્યા હતા. ત્રણ દિવસમાં જ મંદિર તોડી પાડવામાં આવ્યું. બાંગ્લાદેશ રેલ્વે અધિકારીઓએ આ કાર્યવાહી હાથ ધરી હતી અને આ સમય દરમિયાન મોટી સંખ્યામાં સુરક્ષા દળો તૈનાત કરવામાં આવ્યા હતા.

સોશિયલ મીડિયા પર ઘણા ફોટા અને વીડિયો વાયરલ થયા છે જેમાં બુલડોઝરથી મંદિર તોડી પાડવામાં આવી રહ્યું છે, જ્યારે મા દુર્ગાની મૂર્તિ હજુ પણ તેમાં હાજર છે. બાંગ્લાદેશ રેલ્વેનો દાવો છે કે મંદિર રેલ્વેની જમીન પર ગેરકાયદેસર રીતે બનાવવામાં આવ્યું હતું અને તેથી તેને તોડી પાડવામાં આવી રહ્યું છે.

રણધીર જયસ્વાલે કહ્યું કે મંદિરમાંથી મૂર્તિ હટાવ્યા વિના તોડી પાડવામાં આવી હતી. બાંગ્લાદેશમાં આવી ઘટનાઓ સતત બની રહી છે. તેમણે કહ્યું કે યુનુસ સરકાર આ ઘટનાને ગેરકાયદેસર જમીન ઉપયોગ તરીકે રજૂ કરવાનો પ્રયાસ કરી રહી છે.

 

 

(8:50 PM IST)