રાજકોટ : ટપાલ વિભાગ દ્વારા ગ્રાહકોને વધુ સારી સેવાઓ પૂરી પાડવા માટે એક મહત્વપૂર્ણ ડિજિટલ પરિવર્તન હાથ ધરવામાં આવી રહ્યું છે. અદ્યતન એડવાન્સ પોસ્ટલ ટેકનોલોજી (APT) એપ્લિકેશન રોલ આઉટ કરવાનું શરૂ થઈ ગયું છે, જેના ભાગરૂપે રાજકોટ ડિવિઝન હેઠળની તમામ ટપાલ કચેરીઓમાં તા. ૦૮-૦૭-૨૦૨૫ થી નવી સિસ્ટમ અમલમાં આવશે.
સોમવારે તમામ ઓનલાઈન ટ્રાન્ઝેક્શન બંધ રહેશે:
આ આધુનિક ડિજિટલ પ્લેટફોર્મ પર સરળ અને સુરક્ષિત રીતે ડેટાનું સ્થળાંતર કરવા માટે, તા. ૦૭-૦૭-૨૦૨૫ (સોમવાર) ના રોજ "ડાઉન ટાઈમ" નક્કી કરવામાં આવ્યો છે. આનો અર્થ એ છે કે, સોમવારે કોઈ પણ પ્રકારની જાહેર લેણ-દેણ કે ઓનલાઈન ટ્રાન્ઝેક્શન થઈ શકશે નહીં.
રાજકોટ ટપાલ વિભાગ દ્વારા જણાવાયું છે કે, આ હંગામી સેવા વિક્ષેપ ડેટા માઈગ્રેશન, સિસ્ટમ ચકાસણી અને કન્ફિગરેશન પ્રક્રિયા માટે અત્યંત જરૂરી છે. નવી APT એપ્લિકેશન ગ્રાહકોને વધુ સુવિધાયુક્ત અને કાર્યક્ષમ સેવાઓ પૂરી પાડવા માટે રચાયેલ છે.
ટપાલ વિભાગે ગ્રાહકોને તેમની મુલાકાતોનું અગાઉથી આયોજન કરવા અને આ પરિવર્તનના સમયગાળા દરમિયાન સહકાર આપવા માટે અનુરોધ કર્યો છે. આ નવી સિસ્ટમ ભવિષ્યમાં ટપાલ સેવાઓને વધુ ઝડપી અને પારદર્શક બનાવવામાં મદદરૂપ થશે.