બેંગ્લુરુ : બેંગલુરુમાં ૭.૫ કરોડ રૂપિયાની લાલ રંગની ફેરારી SF90 સ્ટ્રેડેલ કાર RTO અધિકારીઓએ કરચોરીના આરોપસર જપ્ત કરી છે. તેના માલિકે કર્ણાટકમાં રોડ ટેક્સ ભર્યો ન હતો. આ કાર મહારાષ્ટ્રમાં રજીસ્ટર થઈ હતી, જ્યાં લક્ઝરી વાહનો પર ટેક્સ ઓછો છે. આ કાર ઘણીવાર બેંગલુરુમાં જોવા મળતી હતી, પરંતુ માલિકે કર્ણાટકમાં રજીસ્ટર કરાવી ન હતી.

કર્ણાટકમાં મોંઘા વાહનો પર રોડ ટેક્સ ખૂબ વધારે છે. પરંતુ આ કારના માલિકે ન તો બેંગલુરુમાં તેનું રજીસ્ટ્રેશન કરાવ્યું હતું અને ન તો અહીં રોડ ટેક્સ ભર્યો હતો. માહિતી મળ્યા પછી, બેંગલુરુ દક્ષિણ RTO એ તપાસ શરૂ કરી અને દસ્તાવેજોની તપાસ કર્યા પછી કાર જપ્ત કરી.

માલિકને નોટિસ મોકલવામાં આવી હતી, જેમાં કહેવામાં આવ્યું હતું કે જો ગુરુવાર સાંજ સુધીમાં ટેક્સ ચૂકવવામાં નહીં આવે તો કાયદેસરની કાર્યવાહી કરવામાં આવશે. આ પછી, માલિકે તાત્કાલિક રૂ. 1.42 કરોડનો ટેક્સ અને દંડ ચૂકવ્યો.

આ કર્ણાટક ટ્રાન્સપોર્ટ વિભાગની સૌથી મોટી ટેક્સ વસૂલાતમાંની એક માનવામાં આવે છે. આ કેસ કર્ણાટકમાં ચાલી રહેલી એક મોટી તપાસનો ભાગ છે, જેમાં RTO લક્ઝરી વાહનોની કરચોરી પર કડક વલણ અપનાવી રહ્યું છે. ફેબ્રુઆરીમાં પણ, વિભાગે 30 મોંઘી કાર જપ્ત કરી હતી, જેમાં ફેરારી, પોર્શ, BMW, રેન્જ રોવર જેવા વાહનોનો સમાવેશ થાય છે.

કાયદા મુજબ, જો કોઈ વાહન કર્ણાટકમાં એક વર્ષથી વધુ સમય સુધી ચાલે છે, તો તેને અહીં નોંધણી કરાવવી અને રોડ ટેક્સ ચૂકવવો જરૂરી છે. આ નિયમ રસ્તાઓ અને માળખાગત સુવિધાઓ જાળવવા માટે છે. અધિકારીઓ કહે છે કે આ કાર્યવાહી જરૂરી છે જેથી બધા વાહન માલિકો ટેક્સ નિયમોનું પાલન કરે અને રાજ્યના રસ્તાઓની જાળવણીમાં ફાળો આપે.