ભારે વરસાદને કારણે કેદારનાથ યાત્રા બંધ કરવામાં આવી છે. સોનપ્રયાગ અને ગૌરીકુંડમાં મુસાફરોને રોકવામાં આવ્યા છે. હવામાન વિભાગે આજે રુદ્રપ્રયાગ અને ચમોલી જિલ્લાઓ માટે વરસાદની ચેતવણી જાહેર કરી છે.

ઉત્તરાખંડના રુદ્રપ્રયાગ અને આસપાસના વિસ્તારોમાં ભારે વરસાદને કારણે, અલકનંદા નદીમાં પાણીનું સ્તર વધ્યું છે. જોકે, નદી હજુ પણ ખતરાના નિશાનથી નીચે વહી રહી છે. ભૂસ્ખલન બાદ બદ્રીનાથ જવાનો રસ્તો બંધ થઈ ગયો છે. ગૌરીકુંડમાં કાટમાળ દૂર કરવાનું કામ ચાલુ છે, જેથી યાત્રા જલ્દી શરૂ કરી શકાય.

ખરેખર ઉત્તરાખંડમાં અત્યારે ભારે વરસાદ પડી રહ્યો છે. આ કારણે ભૂસ્ખલનની ઘટનાઓ પણ સામે આવી રહી છે. તાજેતરમાં ભારે વરસાદને કારણે સોનપ્રયાગમાં ભૂસ્ખલન થયું હતું, જેમાં કેદારનાથથી પરત ફરી રહેલા 40થી વધુ શ્રદ્ધાળુઓ ફસાયા હતા. જોકે, બાદમાં સોનપ્રયાગ ભૂસ્ખલન વિસ્તાર નજીક ફસાયેલા 40 શ્રદ્ધાળુઓને રાજ્ય આપત્તિ પ્રતિભાવ દળ (SDRF) દ્વારા સફળતાપૂર્વક બચાવી લેવામાં આવ્યા હતા.

ઉત્તરાખંડમાં સતત વરસાદને કારણે ઘણા વિસ્તારોમાં વીજ પુરવઠો પણ ખોરવાઈ ગયો છે. ઘણા ભાગોમાં પાણી પુરવઠો પ્રભાવિત થયો છે. તાજેતરમાં બારકોટ નજીક વાદળ ફાટ્યું હતું.

કેદારનાથ યાત્રા હિન્દુ ધર્મનું એક મહત્વપૂર્ણ યાત્રાધામ છે, જે ભારતના ઉત્તરાખંડ રાજ્યમાં સ્થિત કેદારનાથ મંદિરમાં કરવામાં આવે છે. આ મંદિર ભગવાન શિવને સમર્પિત છે અને ચાર ધામ યાત્રા (યમુનોત્રી, ગંગોત્રી, કેદારનાથ અને બદ્રીનાથ) નો ભાગ છે. કેદારનાથ મંદિર હિમાલયની ગોદમાં ૩,૫૮૩ મીટરની ઊંચાઈ પર સ્થિત છે અને તેને ૧૨ જ્યોતિર્લિંગોમાંનું એક માનવામાં આવે છે.