ઇસ્લામાબાદ 7 જુલાઈ 2025: પાકિસ્તાનના સંરક્ષણ મંત્રી ખ્વાજા આસિફ ભારતના દાવાઓ પર ભડક્યા છે! તેમણે ભારપૂર્વક કહ્યું છે કે 7 થી 10 મે સુધી ચાલેલા ચાર દિવસીય સંઘર્ષ દરમિયાન પાકિસ્તાની સેના ભારત સામે "એકલા અને પોતાના દમ પર" લડી હતી, અને તેમને કોઈ બાહ્ય સૈન્ય મદદ મળી નહોતી. ચીન અને તુર્કીથી પાકિસ્તાનને મદદ મળવાના ભારતના દાવાઓને તેમણે "પાયાવિહોણા" ગણાવ્યા.

આસિફનું આ નિવેદન ત્યારે આવ્યું જ્યારે ભારતીય સેનાના એક વરિષ્ઠ અધિકારી, લેફ્ટનન્ટ જનરલ રાહુલ આર સિંહએ સનસનાટીપૂર્ણ ખુલાસો કર્યો. તેમણે જણાવ્યું કે તાજેતરની અથડામણ દરમિયાન ચીને પાકિસ્તાનને લાઇવ સેટેલાઇટ (રીયલ-ટાઇમ સેટેલાઇટ ઇન્ટેલિજન્સ) ઇનપુટ્સ પૂરા પાડ્યા હતા, અને તુર્કીએ લડાકુ ડ્રોન તથા ટેકનિકલ મદદ ઓફર કરી હતી.

આ ખુલાસાઓ પર ખીજવાયેલા ખ્વાજા આસિફે કહ્યું કે પાકિસ્તાનને તેના સહયોગીઓ તરફથી "રાજદ્વારી સમર્થન" મળ્યું હતું, પરંતુ તેમાં કોઈ સૈન્ય મદદ શામેલ નહોતી.
 
હથિયારોની ખરીદી અને યુદ્ધમાં સમર્થન: ખ્વાજા આસિફનો નવો તર્ક!
ખ્વાજા આસિફે ભારપૂર્વક જણાવ્યું કે ભારત સાથેના સંઘર્ષ દરમિયાન સૈન્ય કાર્યવાહી સંપૂર્ણપણે પાકિસ્તાની સેના દ્વારા જ કરવામાં આવી હતી. તેમણે સ્પષ્ટ કર્યું કે સહયોગીઓ પાસેથી રાજદ્વારી સમર્થન સ્વીકારવું એ યુદ્ધમાં સૈન્ય મદદ મેળવવા કરતાં અલગ છે.

તેમણે તર્ક આપ્યો, "જો અમે ચીન પાસેથી હથિયારો ખરીદ્યા, તો શું તેનો અર્થ એ કે ચીન યુદ્ધમાં સામેલ થઈ ગયું? અમે અમેરિકા પાસેથી પણ હથિયારો ખરીદીએ છીએ; શું તેનાથી અમેરિકા યુદ્ધમાં પક્ષકાર બની જાય છે? ભારત પાસે ફ્રાન્સના રાફેલ જેટ છે અને અમારી પાસે ફ્રેન્ચ સબમરીન છે. તો આવા સંજોગોમાં ફ્રાન્સને કયા પક્ષનો ભાગીદાર ગણવામાં આવશે?"
 
ભારતીય સેનાના અધિકારીનો સનસનાટીપૂર્ણ ખુલાસો: 3 મોરચે લડ્યું ભારત!
ભારતીય સેનાના ડેપ્યુટી ચીફ ઑફ આર્મી સ્ટાફ (કેપેબિલિટી ડેવલપમેન્ટ એન્ડ સસ્ટેનન્સ) લેફ્ટનન્ટ જનરલ રાહુલ આર સિંહએ એક કાર્યક્રમમાં જણાવ્યું કે "ઓપરેશન સિંદૂર" પછી પાકિસ્તાનને ચીન અને તુર્કી તરફથી નોંધપાત્ર મદદ મળી હતી.

જનરલ સિંહએ ખુલાસો કર્યો કે ઓપરેશન સિંદૂર દરમિયાન પાકિસ્તાનને ભારતની મહત્વપૂર્ણ સૈન્ય ગતિવિધિઓ વિશે લાઈવ ગુપ્ત માહિતી મળી રહી હતી, અને આ માહિતી કથિત રીતે ચીન તરફથી આવી રહી હતી. વધુમાં, તેમણે ઉમેર્યું કે તુર્કીએ પણ પાકિસ્તાનને યુદ્ધ દરમિયાન ડ્રોન અને અન્ય સહાય પૂરી પાડી હતી, જેમાં બાયરક્તર જેવા ડ્રોન અને પ્રશિક્ષિત કર્મચારીઓ શામેલ હતા. આનો અર્થ એ થયો કે ઓપરેશન દરમિયાન ભારતને એકસાથે ત્રણ મોરચે – પાકિસ્તાન, ચીન અને તુર્કી – સાથે નિપટવાના પડકારનો સામનો કરવો પડ્યો હતો.