દુબઈ 7 જુલાઈ 2025: ભારતીયો માટે મોટા સમાચાર! મુસ્લિમ બહુમતી ધરાવતા દેશ સંયુક્ત આરબ અમીરાત (UAE) એ તેના વિઝા સંબંધિત નિયમોમાં ક્રાંતિકારી બદલાવ કર્યો છે. આ બદલાવથી હવે ભારતીયો માટે ત્યાંનો ગોલ્ડન વિઝા મેળવવો અત્યંત સરળ બની ગયો છે! UAE સરકારે "નોમિનેશન" આધારિત એક નવા પ્રકારનો ગોલ્ડન વિઝા શરૂ કર્યો છે.

અત્યાર સુધી દુબઈનો ગોલ્ડન વિઝા મેળવવા માટે ભારતીયોએ ઓછામાં ઓછા ₹4.66 કરોડની કિંમતની સંપત્તિમાં રોકાણ કરવું પડતું હતું અથવા દેશમાં મોટા પાયે વ્યવસાયમાં રોકાણ કરવું પડતું હતું. પરંતુ હવે નવી નોમિનેશન-આધારિત વિઝા નીતિ હેઠળ કેટલીક નવી શરતો હશે, જે રોકાણની વર્તમાન પ્રક્રિયાથી તદ્દન અલગ છે.
 
માત્ર ₹23.30 લાખમાં આજીવન ગોલ્ડન વિઝા? 5000 થી વધુ ભારતીયો કરશે નોમિનેશન!
લાભાર્થીઓ અને આ પ્રક્રિયા સાથે સંકળાયેલા લોકોએ જણાવ્યું છે કે, આ નવી નોમિનેશન-આધારિત વિઝા નીતિ હેઠળ ભારતીયો હવે લગભગ ₹23.30 લાખની ફી ચૂકવીને આજીવન UAE ના ગોલ્ડન વિઝાનો લાભ મેળવી શકશે! એક અંદાજ મુજબ, આગામી ત્રણ મહિનામાં 5,000 થી વધુ ભારતીયો આ નોમિનેશન-આધારિત વિઝા માટે અરજી કરશે.

આ વિઝા પરીક્ષણના પ્રથમ તબક્કા માટે ભારત અને બાંગ્લાદેશને પસંદ કરવામાં આવ્યા છે. ભારતમાં નોમિનેશન-આધારિત ગોલ્ડન વિઝાના પ્રારંભિક સ્વરૂપનું પરીક્ષણ કરવા માટે રાયદ ગ્રુપ નામની કન્સલ્ટન્સીને પસંદ કરવામાં આવી છે.
 
પૃષ્ઠભૂમિ તપાસ થશે, પણ તકો અપાર!
રાયદ ગ્રુપના મેનેજિંગ ડિરેક્ટર રાયદ કમાલ અયૂબે જણાવ્યું કે, "આ ભારતીયો માટે UAE નો ગોલ્ડન વિઝા મેળવવાની સુવર્ણ તક છે." રાયદ કમાલે કહ્યું કે, જ્યારે પણ કોઈ અરજદાર આ ગોલ્ડન વિઝા માટે અરજી કરશે, ત્યારે તેઓ સૌ પ્રથમ તેની પૃષ્ઠભૂમિની તપાસ કરશે. આ તપાસમાં મની લોન્ડરિંગ વિરોધી અને ફોજદારી રેકોર્ડની તપાસની સાથે સાથે તેમના સોશિયલ મીડિયા પ્રોફાઇલ પણ શામેલ હશે.

પૃષ્ઠભૂમિ તપાસ એ પણ દર્શાવશે કે અરજદાર સંસ્કૃતિ, નાણાં, વેપાર, વિજ્ઞાન, સ્ટાર્ટ-અપ, વ્યાવસાયિક સેવાઓ જેવા અન્ય કયા માધ્યમથી UAE ના બજાર અને વ્યાવસાયિક પ્રવૃત્તિઓને લાભ પહોંચાડી શકે છે. સૌથી મોટી વાત એ છે કે, નોમિનેશન શ્રેણી હેઠળ UAE ગોલ્ડન વિઝા ઇચ્છતા અરજદારો દુબઈ ગયા વિના જ પોતાના દેશમાંથી પૂર્વ-મંજૂરી મેળવી શકે છે.