પટના :  બિહારમાં મતદાર યાદીના સઘન પુનરીક્ષણના ચૂંટણી પંચના અભિયાન પર ભારે રાજકીય હંગામો ચાલી રહ્યો છે. એક તરફ, મતદાર યાદીના પુનરીક્ષણ વિરુદ્ધની અરજીને સુપ્રીમ કોર્ટે સ્વીકારી લીધી છે અને ગુરુવારનો દિવસ સુનાવણી માટે નક્કી કરવામાં આવ્યો છે. બીજી તરફ, પટનામાં પ્રેસ કોન્ફરન્સ કરીને આરજેડી નેતા તેજસ્વી યાદવે ચૂંટણી પંચના અભિયાન પર સવાલો ઉભા કર્યા છે. આ મામલે AIMIM પ્રમુખ અસદુદ્દીન ઓવૈસીએ પણ ચૂંટણી પંચ સામે પોતાની ચિંતાઓ વ્યક્ત કરી છે.
 
તેજસ્વીના આક્ષેપો: "અધિકારીઓ તો માત્ર ટપાલી છે!"
આરજેડી નેતા તેજસ્વી યાદવે જણાવ્યું કે તેઓ ચૂંટણી પંચ (પટના) ગયા હતા અને વોટર લિસ્ટના પુનરીક્ષણ અભિયાન અંગે પોતાનો વાંધો નોંધાવ્યો હતો. તેમણે કહ્યું કે અમારી માંગ છે કે વોટર લિસ્ટ પુનરીક્ષણ અભિયાનને રોકી દેવામાં આવે અને આ કામ ચૂંટણી પછી કરવામાં આવે.

તેજસ્વી યાદવે આકરા શબ્દોમાં કહ્યું કે પુનરીક્ષણના કામમાં અને તેમાં સહયોગ આપનારા લોકોની યાદી ચૂંટણી પંચે જાહેર કરવી જોઈએ. તેમણે કહ્યું, "અમારા પ્રશ્નોના જવાબ ચૂંટણી પંચ આપી રહ્યું નથી. પટનામાં જે અધિકારીઓ છે તે તો 'ડાકિયા' (પોસ્ટમેન) છે. તેમના બોસ લોકો દિલ્હીમાં છે. આદેશ કંઈક બીજો હોય છે, જાહેરાત કંઈક બીજી નીકળે છે. દસ્તાવેજોને લઈને ચૂંટણી પંચ ખુદ કન્ફ્યુઝનમાં છે."

તેમણે કહ્યું કે જાહેરાતમાં કહેવાય છે કે દસ્તાવેજ વગર પણ ગણતરી પત્ર ભરીને જમા કરાવી શકાય છે, પરંતુ આદેશ વિરોધાભાસી બહાર પાડવામાં આવે છે.5 લોકો જાણવા માંગે છે કે ખરેખર કયા દસ્તાવેજો જોઈએ છે અને કયા નથી જોઈતા. દર કલાકે ચૂંટણી પંચ નિર્દેશ બદલી રહ્યું છે. આ શંકા પેદા કરી રહ્યું છે કે કંઈક ગડબડ છે.
 
ઓવૈસીની ચિંતાઓ: 2024ની યાદી આધાર કેમ નથી?
AIMIM ચીફ અસદુદ્દીન ઓવૈસીએ મુખ્ય ચૂંટણી કમિશનર સાથે મુલાકાત કર્યા બાદ જણાવ્યું કે, જે પ્રક્રિયા કરવામાં આવી રહી છે તેના માટે રાષ્ટ્રીય પક્ષો સાથે ચર્ચા કરવામાં આવી નથી. તેમણે કહ્યું કે BLO (બૂથ લેવલ ઓફિસર) ની કોઈ ટ્રેનિંગ થઈ નથી કારણ કે તેમની પાસે હેન્ડબુક નથી. આ કારણોસર ચૂંટણી પંચ જે પ્રક્રિયા કરી રહ્યું છે, તે યોગ્ય નથી.

ઓવૈસીએ સવાલ કર્યો કે 2024ની મતદાર યાદીને ચૂંટણી પંચ આધાર કેમ નથી બનાવી રહ્યું? જે મતદારોએ 2024માં વોટ આપ્યો, આખરે 2025માં તેમની ઓળખ કેમ પૂછવામાં આવી રહી છે? તેમણે કહ્યું કે મોટી સંખ્યામાં એવા લોકો છે જેઓ પ્રવાસી મજૂર છે અને જેમની પાસે પોતાના દસ્તાવેજો નથી.
 
સુપ્રીમ કોર્ટની દખલગીરી અને 9 જુલાઈએ બિહાર બંધ:
આ મામલે સુપ્રીમ કોર્ટે પણ ગંભીર નોંધ લીધી છે. 10 જુલાઈ 2025ના રોજ આ મામલે સુનાવણી થવાની છે. કોર્ટે ચૂંટણી પંચને નોટિસ પણ પાઠવી છે. અત્યાર સુધી આ મામલે 5 અરજીઓ દાખલ થઈ ચૂકી છે. જેમાં એસોસિએશન ફોર ડેમોક્રેટિક રિફોર્મ્સ (ADR), યોગેન્દ્ર યાદવ, મહુઆ મોઇત્રા, મનોજ ઝા અને મુજાહિદ આલમનો સમાવેશ થાય છે. આ તમામ અરજીઓમાં ચૂંટણી પંચની પ્રક્રિયાને મનસ્વી અને નિષ્પક્ષ ચૂંટણીને પ્રભાવિત કરનારી ગણાવવામાં આવી છે. આશંકા વ્યક્ત કરવામાં આવી છે કે વિશેષ પુનરીક્ષણ અભિયાનને કારણે લાખો લોકોના નામ મતદાર યાદીમાંથી હટી શકે છે, જેનાથી ચૂંટણીની નિષ્પક્ષતા પર સવાલો ઉભા થાય છે.

વોટર લિસ્ટ પુનરીક્ષણ અભિયાનના વિરોધમાં 9 જુલાઈના રોજ બિહાર બંધનું એલાન કરવામાં આવ્યું છે, જેમાં રાહુલ ગાંધી પણ શામેલ થશે.

બિહારમાં મતદાર યાદીના આ પુનરીક્ષણ અભિયાનને લઈને ઊભો થયેલો આ વિવાદ આગામી ચૂંટણીઓમાં શું અસર કરશે તે જોવું રસપ્રદ રહેશે.