વડોદરા : પાદરાના મૂજપુર ખાતે બ્રિજ તૂટી પડવાની ગમખ્વાર દુર્ઘટનામાં બચાવ કામગીરી મોડી રાત સુધી ચાલી હતી, જેમાં વધુ ત્રણ મૃતદેહો મળી આવતા મૃત્યુઆંક વધવાની ભીતિ સેવાઈ રહી છે. છેલ્લા ૧૨ કલાકથી વધુ સમયથી ચાલી રહેલી આ કામગીરીમાં જિલ્લા કલેક્ટર સહિતના ઉચ્ચ અધિકારીઓ સવારથી જ ઘટનાસ્થળે હાજર રહીને સતત નિરીક્ષણ કરી રહ્યા છે.
બચાવ કામગીરીની વિગતો:
બ્રિજ તૂટી પડ્યા બાદ નદીમાં કીચડ અને સિરામિક ટાઇલ્સ ભરેલા ટ્રકને ખસેડવાની કામગીરી સૌથી મોટી પડકારજનક હતી. મોડી રાતે ફ્લડ લાઈટ લગાવીને આ કામગીરી પુરજોશમાં કરવામાં આવી હતી. ટ્રકને ખેંચવા માટે ખાસ વાયરો મંગાવવામાં આવ્યા હતા. તેને હિટાચી મશીન સાથે બાંધી ટ્રકને સીધો કરવામાં આવતા તેની નીચેથી ત્રણ વ્યક્તિના મૃતદેહો મળી આવ્યા હતા.
મૃતદેહોને તાત્કાલિક પાદરા સ્થિત સામૂહિક આરોગ્ય કેન્દ્ર ખાતે તબીબી પરીક્ષણ માટે ખસેડવામાં આવ્યા હતા અને ત્યારબાદ તેમના પરિવારજનોને સોંપવામાં આવ્યા હતા. જિલ્લા વિકાસ અધિકારી મમતા હીરપરા અને મુખ્ય જિલ્લા આરોગ્ય અધિકારી સામૂહિક આરોગ્ય કેન્દ્ર ખાતે સતત હાજર રહીને હતભાગીઓના પરિજનોને કોઈ તકલીફ ન પડે તેની તકેદારી રાખી હતી.
સરકાર દ્વારા તાત્કાલિક નોંધ:
આ ઘટનાની ગંભીરતાપૂર્વક નોંધ લઈને રાજ્ય સરકાર દ્વારા માર્ગ અને મકાન વિભાગના મુખ્ય ઇજનેર પટેલિયાને તાત્કાલિક ઘટનાસ્થળે મોકલવામાં આવ્યા હતા, જેમણે પરિસ્થિતિનું નિરીક્ષણ કર્યું હતું.
પૂનમ અને નદીમાં જળપ્રવાહ વધવાનો ભય:
પૂનમના કારણે મહી નદીમાં જળ પ્રવાહ વધે તેવી શક્યતા છે. આ સંજોગોમાં, શક્ય હોય તેટલી ઝડપથી બચાવ અને શોધખોળની કામગીરી પૂર્ણ કરવા માટે સમગ્ર તંત્ર તનતોડ મહેનત કરી રહ્યું છે.
મૃતકોની ઓળખ:
મોડી સાંજે મળેલા મૃતદેહો પૈકી બે વ્યક્તિની ઓળખ સ્થાપિત થઈ શકી છે. જેમાં એક દ્વારકાના મહેન્દ્રભાઈ પર્વતભાઈ હથીયા અને બીજા આંકલાવના વિષ્ણુભાઈ રાવલનો સમાવેશ થાય છે. અન્ય મૃતકની ઓળખ પ્રસ્થાપિત કરવાની કામગીરી ચાલી રહી છે. આ દુર્ઘટનામાં હજુ પણ કેટલાક લોકો ફસાયા હોવાની આશંકા છે અને બચાવ કામગીરી ચાલુ રહેશે.