ન્‍યુયોર્ક, તા.૧૦: અમેરિકાના ટોચના અબજોપતિઓની યાદીમાં ભારતે ચીન અને ઇઝરાયલને પાછળ છોડીને એક મહત્‍વપૂર્ણ સીમાચિﾎ હાંસલ કર્યું છે. આ યાદીમાં ઉદ્યોગસાહસિક જય ચૌધરીને સૌથી ધનિક ભારતીય-અમેરિકન તરીકે ઓળખવામાં આવ્‍યા છે. ફોર્બ્‍સ દ્વારા તાજેતરમાં જાહેર કરાયેલ અમેરિકાના સૌથી ધનિક ઇમિગ્રન્‍ટ્‍સ ૨૦૨૫ની યાદીમાં આ માહિતી આપવામાં આવી છે. આમાં, ભારતને અમેરિકામાં અબજોપતિ ઇમિગ્રન્‍ટ્‍સનો સૌથી મોટોસ્ત્રોત દેશ તરીકે વર્ણવવામાં આવ્‍યો છે. આ અહેવાલ બુધવારે પ્રકાશિત થયો હતો અને આમાં ભારતે ઇઝરાયલ અને તાઇવાનને પાછળ છોડી દીધા છે.

ફોર્બ્‍સ અનુસાર, યુ.એસ.માં રહેતા વિદેશી મૂળના અબજોપતિ નાગરિકોની સંખ્‍યા હવે વધીને ૧૨૫ થઈ ગઈ છે, જે ૨૦૨૨માં ૯૨ હતી. આ અબજોપતિઓ હવે કુલ યુ.એસ. અબજોપતિઓની સંપત્તિના ૧૮% હિસ્‍સો ધરાવે છે, જે અંદાજે ૭.૨ ટ્રિલિયન છે. વિદેશી અબજોપતિઓની કુલ સંપત્તિ ૧.૩ ટ્રિલિયન હોવાનો અંદાજ છે, જે એક સર્વકાલીન રેકોર્ડ છે.

૨૦૨૨ માં, અમેરિકામાં ભારતમાંથી ફક્‍ત ૭ અબજોપતિ ઇમિગ્રન્‍ટ્‍સ હતા, જ્‍યારે ઇઝરાયલ, કેનેડા જેવા દેશો તેનાથી આગળ હતા. પરંતુ ભારત ૨૦૨૫ ની યાદીમાં ટોચના સ્‍થાને પહોંચી ગયું છે, જેમાં હવે ૧૨ ભારતીય મૂળના અબજોપતિ વિદેશીઓનો સમાવેશ થાય છે. ઇઝરાયલ અને તાઇવાન ૧૧ અબજોપતિઓ સાથે સંયુક્‍ત રીતે બીજા સ્‍થાને છે. ચીન પણ ૮ અબજોપતિઓ સાથે યાદીમાં છે.

આ યાદીમાં ઝેડસ્‍કેલરના સીઈઓ અને સાયબર સુરક્ષાના અનુભવી જય ચૌધરીને સૌથી ધનિક ભારતીય-અમેરિકન અબજોપતિ તરીકે નામ આપવામાં આવ્‍યું છે. તેમની કુલ સંપત્તિ ઼૧૭.૯ બિલિયન (લગભગ રૂ.૧.૪૯ લાખ કરોડ) હોવાનું કહેવાય છે. અન્‍ય અગ્રણી ભારતીય મૂળના અબજોપતિઓમાં ગૂગલના સીઈઓ સુંદર પિચાઈ અને ખોસલા વેન્‍ચર્સના વિનોદ ખોસલાનો સમાવેશ થાય છે.

ફોર્બ્‍સ અનુસાર, એલોન મસ્‍ક માત્ર અમેરિકામાં જ નહીં પરંતુ વિશ્વના સૌથી ધનિક વિદેશી અબજોપતિ છે. દક્ષિણ આફ્રિકામાં જન્‍મેલા મસ્‍ક કેનેડા થઈને અમેરિકા આવ્‍યા હતા અને તેમની કુલ સંપત્તિ લગભગ ૪૦૦ બિલિયન છે. બીજા સ્‍થાને ગૂગલના સહ-સ્‍થાપક સેર્ગેઈ બ્રિન છે, જેમની સંપત્તિ ૧૩૯.૭ બિલિયન હોવાનો અંદાજ છે. ફોર્બ્‍સ કહે છે કે અમેરિકાના ટોચના ૧૦ અબજોપતિઓમાંથી ત્રણ ઇમિગ્રન્‍ટ મૂળના છે, જે દર્શાવે છે કે વૈશ્વિક પ્રતિભા અમેરિકાના આર્થિક પરિદૃશ્‍યને કેવી રીતે આકાર આપી રહી છે. (રર.ર)