હરિયાણા સરકારે લિંગ ગુણોત્તર જાળવવા માટે એક નવો નિયમ લાગુ કર્યો છે. જે દંપતી પહેલાથી જ એક પુત્રીના માતા-પિતા છે અને હવે IVF દ્વારા બીજું બાળક મેળવવા માંગે છે, તેમણે સરકાર પાસેથી પરવાનગી લેવી પડશે. દંપતીએ IVF કરાવવાનું કારણ અને તેઓ ક્યારે કરાવવા માંગે છે તે જણાવવાનું રહેશે. સરકારની પરવાનગી વિના છોકરીના માતા-પિતા IVF કરાવી શકશે નહીં. આ નિયમ હરિયાણાના આરોગ્ય વિભાગ દ્વારા જારી કરવામાં આવ્યો છે. IVF પ્રક્રિયા દ્વારા લિંગ પસંદગીના વલણને રોકવા માટે આ નિર્ણય લેવામાં આવ્યો છે.

    નવા નિયમ હેઠળ, દંપતીએ હવે જિલ્લા યોગ્ય સત્તામંડળને અરજી કરવી પડશે. આમાં, પહેલા બાળકનું જન્મ પ્રમાણપત્ર સબમિટ કરવાનું રહેશે. અગાઉની ગર્ભાવસ્થા અને કસુવાવડ વિશે તબીબી માહિતી આપવી પડશે. IVF કરાવવાનું કારણ જણાવવું પડશે. જો કોઈ દંપતી પરવાનગી વિના આવું કરશે તો તેમની સામે કાયદેસરની કાર્યવાહી કરવામાં આવશે. હરિયાણામાં ઘટતો લિંગ ગુણોત્તર પણ આ નિયમ બનાવવાનું એક મુખ્ય કારણ માનવામાં આવે છે. 

    હરિયાણામાં જન્મ સમયે લિંગ ગુણોત્તર 2024માં ઘટીને 1000 છોકરાઓ દીઠ 910 છોકરીઓ થઈ ગયો છે, જે રાજ્ય માટે ચિંતાનો વિષય છે. જ્યારે 2018 અને 2019માં આ આંકડો અનુક્રમે 914 અને 923 પર પહોંચ્યો. આ ઘટાડા પાછળ IVF દરમિયાન કરવામાં આવતી લિંગ પસંદગી એક મુખ્ય કારણ માનવામાં આવે છે. એવું માનવામાં આવે છે કે કેટલાક IVF કેન્દ્રોમાં, બાળકના લિંગ વિશેની માહિતી માતાપિતા સાથે શેર કરવામાં આવે છે. આનું કારણ એ છે કે IVFમાં ગર્ભ પ્રયોગશાળામાં તૈયાર થાય છે. જેના દ્વારા લિંગ ઓળખી શકાય છે. આ કરવું નિયમોની વિરુદ્ધ છે. 

   એવી આશંકા છે કે છેલ્લા કેટલાક વર્ષોમાં, IVF ટેકનોલોજીની મદદથી, લોકો બાળકનું લિંગ અગાઉથી શોધી રહ્યા છે. આ કારણે છોકરીઓની સંખ્યા ઘટી રહી છે. બેટી બચાવો, બેટી પઢાઓ જેવા અભિયાનો છતાં, લિંગ ગુણોત્તરમાં કોઈ સુધારો થયો નથી. આને ધ્યાનમાં રાખીને, આ નવો નિયમ બનાવવામાં આવ્યો છે. નવી માર્ગદર્શિકા રાજ્યમાં લિંગ ગુણોત્તરમાં સુધારો કરશે અને ગર્ભ લિંગ પસંદગી જેવી ગેરકાયદેસર પ્રથાઓને અંકુશમાં લેશે તેવી અપેક્ષા છે. 

બધી સારવાર અને ગર્ભ પસંદગીની જાણ આરોગ્ય વિભાગને કરવી ફરજિયાત રહેશે. કોઈ પણ સંજોગોમાં ફક્ત પુરુષ ગર્ભનું જ પ્રત્યારોપણ કરવામાં આવશે નહીં