મહારાષ્ટ્રના હિંગોલી જિલ્લામાં સંજીવની યોજના હેઠળ સ્ક્રીનીંગ દરમિયાન 14,500 થી વધુ મહિલાઓમાં કેન્સર જેવા લક્ષણો જોવા મળ્યા. આ યોજના હેઠળ,  8 માર્ચથી કુલ 2.9 લાખ મહિલાઓનો સર્વે કરવામાં આવ્યો હતો, જેમાં તેમને કેન્સરના લક્ષણો સંબંધિત પ્રશ્નોના જવાબ આપવાના હતા.

આમાંથી 14,542 મહિલાઓમાં કેન્સર જેવા લક્ષણો જોવા મળ્યા હતા. રાજ્યના આરોગ્ય પ્રધાન પ્રકાશ અબિતકરે ગુરુવારે વિધાનસભામાં જણાવ્યું હતું કે, તપાસ અને પરીક્ષણ દરમિયાન 3 મહિલાઓને સર્વાઇકલ કેન્સર, એકને સ્તન કેન્સર અને 8 મહિલાઓને મોઢાનું કેન્સર હોવાનું જાણવા મળ્યું હતું.

આરોગ્ય મંત્રીએ જણાવ્યું હતું કે હિંગોલી જિલ્લા કલેક્ટર દ્વારા કેન્સર શોધી કાઢવા અને તાત્કાલિક સારવાર પૂરી પાડવા માટે એક અભિયાન શરૂ કરવામાં આવ્યું છે. તેમણે કહ્યું કે ગ્રામીણ વિસ્તારોમાં કેન્સરનું નિદાન કરવા માટે આરોગ્ય શિબિરો અને સ્ક્રીનીંગનું આયોજન કરવામાં આવે છે.

મંત્રીએ મહિલાઓ માટે અલગ કેન્સર હોસ્પિટલ સ્થાપવાની કોઈપણ યોજનાને નકારી કાઢી હતી. તેમણે કહ્યું કે જિલ્લા હોસ્પિટલો અને મેડિકલ કોલેજોમાં સારવાર સુવિધાઓ પૂરી પાડવામાં આવે છે અને ટાટા મેમોરિયલ હોસ્પિટલના કેન્સર નિષ્ણાતો દર મહિને બે વાર 11 જિલ્લા હોસ્પિટલોની મુલાકાત લે છે. 

 આરોગ્ય મંત્રીએ જણાવ્યું હતું કે આઠ જિલ્લા હોસ્પિટલોમાં ડે-કેર કીમોથેરાપી કેન્દ્રો શરૂ કરવામાં આવ્યા છે અને તમામ જિલ્લાઓમાં તેમને સ્થાપિત કરવાની પ્રક્રિયા ચાલી રહી છે.