નવી દિલ્હી : કેન્દ્ર સરકાર ટૂંક સમયમાં જ IDBI બેંકમાં પોતાની સંપૂર્ણ હિસ્સેદારી વેચવાની તૈયારીમાં છે. આ વ્યૂહાત્મક વિનિવેશ પ્રક્રિયાને ઓક્ટોબર 2025 સુધીમાં અંતિમ રૂપ આપવાનું લક્ષ્ય નક્કી કરવામાં આવ્યું છે. આ બાબત સાથે સંકળાયેલા બે અધિકારીઓએ જણાવ્યું છે કે ટૂંક સમયમાં જ બેંકમાં હિસ્સેદારી વેચવા માટે સરકાર બોલીઓ આમંત્રિત કરશે અને પ્રક્રિયા શરૂ થઈ જશે.
 
સરકાર અને LICની સંયુક્ત હિસ્સેદારીનું વેચાણ
વર્તમાનમાં કેન્દ્ર સરકાર પાસે IDBI બેંકમાં 30.48% અને ભારતીય જીવન વીમા નિગમ (LIC) પાસે 49.24% હિસ્સેદારી છે. આ બંને મળીને બેંકમાં કુલ 60.72% હિસ્સેદારી વેચશે, જેનાથી IDBI બેંક સંપૂર્ણપણે ખાનગી બેંક બની જશે.

9 જુલાઈના રોજ યોજાયેલી ઇન્ટર-મિનિસ્ટ્રીયલ ગ્રુપ (IMG) ની બેઠકમાં ડ્રાફ્ટ શેર પરચેઝ એગ્રીમેન્ટ (Share Purchase Agreement - SPA) પર ચર્ચા કરવામાં આવી હતી. આ કરાર લેણદેણની શરતો નક્કી કરે છે અને તેને ઉચ્ચ અધિકારીઓ તરફથી મંજૂરી મળ્યા બાદ નાણાકીય બોલીઓ માટે માર્ગ મોકળો થશે. સૂત્રો અનુસાર, જો બધું યોજના મુજબ ચાલે છે, તો ઓક્ટોબર સુધીમાં IDBI બેંકનું ખાનગીકરણ પૂર્ણ થઈ જશે.
 
બેંકોના ખાનગીકરણનો માર્ગ સ્પષ્ટ થશે?
IDBI બેંકનું આ વિનિવેશ કેન્દ્ર સરકારની મોટી ખાનગીકરણ યોજનાનો એક ભાગ છે, જેને એક પાયલોટ પ્રોજેક્ટ તરીકે જોવામાં આવી રહ્યો છે. આ પગલાને સફળતાપૂર્વક પાર પાડવામાં આવે તો તે અન્ય જાહેર ક્ષેત્રની બેંકોમાં હિસ્સેદારી વેચાણ માટે માર્ગદર્શક સાબિત થઈ શકે છે.

સરકારી સૂત્રોનું કહેવું છે કે SPA ને અંતિમ મંજૂરી મળતાની સાથે જ નાણાકીય બોલીઓ આમંત્રિત કરવામાં આવશે, અને પસંદ કરાયેલા બોલીદાતા સાથે તે જ દિવસે સોદાને અંતિમ રૂપ આપીને શેર ટ્રાન્સફર કરી દેવામાં આવશે. આ નિર્ણય ભારતના બેંકિંગ ક્ષેત્રમાં એક મોટો બદલાવ લાવી શકે છે, જેનાથી ભવિષ્યમાં વધુ સરકારી બેંકોનું ખાનગીકરણ થવાની સંભાવના વધી જશે.