લખનૌ : ઉત્તર પ્રદેશના મુખ્યમંત્રી યોગી આદિત્યનાથે શનિવારે ગેરકાયદેસર ધર્માંતરણ અને રાષ્ટ્રવિરોધી પ્રવૃત્તિઓ અંગે આકરા તેવર અપનાવ્યા છે. તેમણે સ્પષ્ટપણે કહ્યું કે, દેશની એકતા તોડવાનું ષડયંત્ર રચાઈ રહ્યું છે. બલરામપુરથી ઝડપાયેલા છાંગુર બાબા તરફ ઇશારો કરતા CM યોગીએ સનસનાટીપૂર્ણ દાવો કર્યો કે, "ભય અને લાલચ આપીને અનુસૂચિત જાતિનું ધર્માંતરણ કરાવવામાં આવી રહ્યું છે અને આ માટે વિદેશથી ભંડોળ પણ પૂરું પાડવામાં આવી રહ્યું છે!"
 
₹100 કરોડથી વધુનું ટ્રાન્ઝેક્શન અને 40 બેંક ખાતા:
મુખ્યમંત્રી યોગી આદિત્યનાથે જણાવ્યું, "અવૈધ ધર્માંતરણ વિરુદ્ધ કાર્યવાહી થઈ રહી છે. અનુસૂચિત જાતિનું ધર્માંતરણ કરાવવામાં આવી રહ્યું છે. આપણને બધાને તોડવાનું ષડયંત્ર રચાઈ રહ્યું છે. ભય અને લાલચ આપીને ધર્માંતરણ કરાવવામાં આવી રહ્યું છે. દેશનું સ્વરૂપ બદલવાનો પ્રયાસ થઈ રહ્યો હતો. ધર્માંતરણ માટે વિદેશથી પૈસા આવી રહ્યા છે. છાંગુર બાબાના 40 થી વધુ ખાતામાં ₹100 કરોડથી વધુનું ટ્રાન્ઝેક્શન થયું હોવાનું સામે આવ્યું છે."
 
"અમે ધરતી માતાની રક્ષા કરીશું": CM યોગી
આ પહેલા, બુધવારે પણ મુખ્યમંત્રી યોગી આદિત્યનાથે છાંગુર બાબાના મુદ્દે નિવેદન આપ્યું હતું. તેમણે કહ્યું હતું કે, "અમે બલરામપુરમાં એક અપરાધીને પકડ્યો છે, જે મહિલાઓની ગરિમા સાથે રમત કરતો હતો. અમે સમાજને તૂટવા નહીં દઈએ અને રાષ્ટ્રવિરોધી, અસામાજિક તત્વોનો પણ નાશ કરીશું. આ સાથે જ, અમે ધરતી માતાની પણ રક્ષા કરીશું."

આઝમગઢમાં એક વૃક્ષારોપણ જનસભા દરમિયાન CM યોગીએ ભારપૂર્વક કહ્યું કે, "આ ધરતી માત્ર જમીનનો એક ટુકડો નથી. ધરતી માતા સ્વસ્થ રહેશે તો આપણે સ્વસ્થ રહીશું. જો ધરતી માતા બીમાર થશે તો સૃષ્ટિ માટે જીવન-મરણનો પ્રશ્ન બની જશે."

તેમણે વધુમાં કહ્યું, "તમે જોયું જ હશે કે ગઈકાલે સમાજ વિરોધી, રાષ્ટ્રદ્રોહી કાર્યોમાં સામેલ તત્વો વિરુદ્ધ કેવી કાર્યવાહી કરવામાં આવી. બલરામપુરમાં એક 'જલ્લાદ' ને અમે પકડ્યો. તે હિન્દુ બહેન-દીકરીઓની ઇઝ્જત સાથે ચેડા કરતો હતો, સોદેબાજી કરતો હતો, પરંતુ હવે આવા તત્વો વિરુદ્ધ કડક કાર્યવાહી કરવામાં આવી રહી છે. અમે સમાજને તૂટવા નહીં દઈએ. રાષ્ટ્રવિરોધી, સમાજ વિરોધી તત્વોને ધૂળ ચાટતા કરી દઈશું. ધરતી માતાના સ્વાસ્થ્યની રક્ષા કરીશું અને માતાની સ્મૃતિઓને પણ જીવંત બનાવીશું."

CM યોગીના આ આકરા વલણથી ગેરકાયદેસર ધર્માંતરણના મુદ્દે મોટી કાર્યવાહી થવાના સંકેત મળી રહ્યા છે.