મુંબઈ, શનિવાર, 12 જુલાઈ, 2025: બોલિવૂડના મિસ્ટર પરફેક્શનિસ્ટ આમિર ખાને એક તાજેતરના ઇન્ટરવ્યુમાં 39 વર્ષ જૂના એક કિસ્સાનો ખુલાસો કરીને બધાને ચોંકાવી દીધા છે! તેમણે આરોપ લગાવ્યો છે કે, પાકિસ્તાનના પૂર્વ ક્રિકેટર જાવેદ મિયાંદાદે તેમના લગ્નની ખુશીઓ બરબાદ કરી દીધી હતી. આમિરે જણાવ્યું કે, જે દિવસે તેમણે રીના (તેમની પ્રથમ પત્ની) સાથે ગુપ્ત રીતે લગ્ન કર્યા હતા, તે જ દિવસે જાવેદ મિયાંદાદે ભારત સામેની એક મેચમાં છેલ્લી બોલ પર સિક્સર ફટકારીને પાકિસ્તાનને જીત અપાવી હતી!
 
લગ્ન અને ક્રિકેટનું અનોખુ 'કનેક્શન': આમિરની કહાણી!
ક્રિકેટ અને બોલિવૂડનો સંબંધ કોઈનાથી છુપાયેલો નથી. વિરાટ કોહલી-અનુષ્કા શર્મા, કે.એલ. રાહુલ-અથિયા શેટ્ટી જેવા ઘણા ઉદાહરણો છે જ્યાં ક્રિકેટરોએ અભિનેત્રીઓ સાથે લગ્ન કર્યા છે. શાહરૂખ ખાન અને પ્રીતિ ઝિન્ટા જેવી બોલિવૂડ હસ્તીઓ ક્રિકેટ ટીમોની માલિક પણ છે. આમિર ખાન પણ ક્રિકેટના મોટા ચાહક છે, તેઓ 2013માં સચિન તેંડુલકરની નિવૃત્તિ વખતે અને 2011ના વર્લ્ડ કપ ફાઇનલમાં એમએસ ધોનીની વિજેતા સિક્સર વખતે પણ વાનખેડે સ્ટેડિયમમાં હાજર હતા.

પરંતુ તેમનું ક્રિકેટ કનેક્શન અહીં પૂરું થતું નથી. હાલમાં જ 'લલ્લનટોપ'ને આપેલા ઇન્ટરવ્યુમાં આમિર ખાને 18 એપ્રિલ, 1986ના રોજ બનેલી એક અનોખી ઘટના વર્ણવી.
 
શારજાહનો એ ઐતિહાસિક સિક્સર અને આમિરનું 'ડિપ્રેશન'!
આમિરે જણાવ્યું, "મેં અને રીનાએ ગુપ્ત રીતે લગ્ન કર્યા હતા અને અમારા માતા-પિતાને પણ આ અંગે જાણ કરી ન હતી. એ જ દિવસે શારજાહમાં ઓસ્ટ્રેલિયન-એશિયા કપની ફાઇનલમાં મિયાંદાદે છેલ્લી બોલ પર સિક્સર ફટકારીને પાકિસ્તાનને ભારત સામે જીત અપાવી હતી. એ જ દિવસે અમારા લગ્ન થયા હતા."

તેમણે આગળ કહ્યું, "ઘરે પાછા ફર્યા ત્યારે અમે ખૂબ જ તણાવમાં હતા, પરંતુ કોઈએ અમને કંઈ પૂછ્યું નહીં કારણ કે બધા મેચ જોવામાં વ્યસ્ત હતા. હું ખુશ હતો કે મારા લગ્નના દિવસે ભારત પાકિસ્તાન સામે મેચ જીતી રહ્યું હતું, પણ પછી મિયાંદાદે સિક્સર મારી અને અમે હારી ગયા. ઘણા વર્ષો પછી, હું જાવેદ મિયાંદાદને એક ફ્લાઈટમાં મળ્યો. મેં તેમને કહ્યું, 'જાવેદ ભાઈ, તમે સારું ન કર્યું. તમે મારી લગ્નની ખુશી બરબાદ કરી દીધી. તે દિવસે તમે સિક્સર મારી હતી. હું ડિપ્રેશનમાં જતો રહ્યો હતો!'"
 
જાવેદ મિયાંદાદ: એક દિગ્ગજ ક્રિકેટરની અમર યાદગીરી
નોંધનીય છે કે, જાવેદ મિયાંદાદને પાકિસ્તાનના અત્યાર સુધીના સૌથી મહાન બેટ્સમેનોમાંના એક માનવામાં આવે છે. તેમણે 124 ટેસ્ટ મેચમાં 52.57ની સરેરાશથી 8832 રન બનાવ્યા છે, જ્યારે 233 વનડે મેચમાં તેમણે 41.70ની સરેરાશથી 7381 રન બનાવ્યા છે. ભારત સામે છેલ્લી બોલ પર સિક્સર ફટકારીને મેચ જીતાડવાની તેમની તે ઈનિંગ્સ હંમેશા યાદ કરવામાં આવે છે.

આમિર ખાનના આ ખુલાસાએ ફરી એકવાર ક્રિકેટ અને બોલિવૂડના રોમાંચક સંબંધોને તાજી કર્યા છે!