નવી દિલ્હી, તા. 15 : ભારતીય અવકાશયાત્રી ગ્રુપ કેપ્ટન શુભાંશુ શુક્લા 18 દિવસની ઐતિહાસિક અવકાશ યાત્રા બાદ આંતરરાષ્ટ્રીય અવકાશ સ્ટેશન (ISS) પરથી સુરક્ષિત રીતે પૃથ્વી પર પરત ફર્યા છે. ભારતીય સમય અનુસાર આજે બપોરે ત્રણ વાગ્યે તેમનું ડ્રેગન કેપ્સ્યુલ કેલિફોર્નિયાના દરિયાકાંઠે પ્રશાંત મહાસાગરમાં સફળતાપૂર્વક 'સ્પ્લેશડાઉન' થયું. આ લેન્ડિંગ સંપૂર્ણપણે સફળ રહી હતી, જે ભારત અને વૈશ્વિક અવકાશ મિશન માટે એક મહત્વપૂર્ણ સિદ્ધિ છે.
એક્સिओમ-4 મિશન હેઠળ 25 જૂને ફ્લોરિડાના કેનેડી સ્પેસ સેન્ટરથી લોન્ચ થયેલા શુભાંશુએ ISS પર અનેક વૈજ્ઞાનિક પ્રયોગો કર્યા, જેમાં છોડના વિકાસ અને માઇક્રોગ્રેવિટીના પ્રભાવનો અભ્યાસ સામેલ હતો. તેમની ટીમમાં અમેરિકાના પેગી વ્હિટસન, પોલેન્ડના સ્લાવોસ ઉજનાન્સ્કી અને હંગેરીના ટિબોર કાપુનો સમાવેશ થતો હતો. આ ચારેય અવકાશયાત્રીઓ સોમવારે સાંજે 4:35 વાગ્યે (IST) ISS પરથી નીકળ્યા હતા અને ડ્રેગન કેપ્સ્યુલમાં સવાર હતા. 22.5 કલાકની લાંબી યાત્રા બાદ તેમનું સુરક્ષિત અવતરણ થયું.
લખનઉમાં જશ્નનો માહોલ, માતાની આંખોમાં આનંદના અશ્રુ
શુભાંશુ શુક્લા મૂળભૂત રીતે લખનઉના રહેવાસી છે અને તેમની સફળ વાપસી બાદ લખનઉમાં તેમના પરિવાર અને શુભચિંતકોમાં જશ્નનો માહોલ છવાયો છે. પરિવારના સભ્યોએ એકબીજાને અભિનંદન પાઠવ્યા અને કેક કાપીને ખુશી મનાવી. શુભાંશુની માતાએ પુત્રના સફળ અવતરણ બાદ ખુશી વ્યક્ત કરતા જણાવ્યું કે, "ખૂબ જ સારું લાગી રહ્યું છે." તેમણે ઉમેર્યું કે પરિવારના અન્ય સભ્યો અમેરિકામાં છે અને તેઓ બધા સાથે મળીને દેશ પાછા ફરશે. નાસા અને સ્પેસએક્સ દ્વારા આ સમગ્ર લેન્ડિંગ પ્રક્રિયાનું જીવંત પ્રસારણ કરવામાં આવ્યું હતું, જેને જોઈને શુભાંશુની માતાની આંખો ખુશીના આંસુથી ભરાઈ ગઈ હતી. આ સફળ લેન્ડિંગ ભારતીય અવકાશ સંશોધનમાં એક નવો અધ્યાય ઉમેરે છે.