બરેલી, ઉત્તર પ્રદેશ : ઉત્તર પ્રદેશના બરેલીમાં 'કાંવડ યાત્રા' પર કવિતા લખીને ભારે વિવાદમાં સપડાયેલા શિક્ષક રજનીશ ગંગવારે આખરે ભારે વિરોધ બાદ માફી માંગી લીધી છે. તેમણે સ્પષ્ટતા કરી છે કે, "ન હું ધર્મ વિરોધી છું અને ન સરકાર વિરોધી. બંને વસ્તુ સારી છે. હું સમર્થક પણ છું. જો મારા કારણે કોઈની ભાવનાને ઠેસ પહોંચી હોય તો હું ક્ષમાપ્રાર્થી છું." આ સાથે જ શિક્ષકે ભવિષ્યમાં આવી ઘટનાનું પુનરાવર્તન નહીં થાય તેવી ખાતરી પણ આપી છે.

શું હતો વિવાદ?
વાસ્તવમાં, શિક્ષક રજનીશ ગંગવાર પર હિન્દુ સંગઠનોના લોકોએ આરોપ લગાવ્યો હતો કે તેમની કવિતા ધર્મ વિરોધી અને કાંવડ યાત્રાની વિરુદ્ધ હતી. તેમણે શિક્ષકને બરતરફ કરવા અને જેલમાં મોકલવાની માંગ કરી હતી, જેના પગલે પોલીસ દ્વારા કેસ પણ દાખલ કરવામાં આવ્યો હતો.

બહેડીના MGM ઇન્ટર કોલેજમાં ફરજ બજાવતા રજનીશ ગંગવારનો એક વિડીયો વાયરલ થયો હતો, જેમાં તેમણે એસેમ્બલી દરમિયાન વિદ્યાર્થીઓને સંબોધતા 'કાંવડ' ને લઈને કથિત વિવાદાસ્પદ કવિતા વાંચી હતી. તેમની કવિતાના શબ્દો હતા: "કાંવડ લેને મત જાના, તુમ જ્ઞાન કા દીપ જલાના... માનવતા કી સેવા કરકે તુમ સચ્ચે માનવ બન જાના." તેમણે એમ પણ કહ્યું હતું કે, "કાંવડ ઉઠાવવાથી કોઈ SP-DM નથી બનતું." આ વિડીયો વાયરલ થયા બાદ ભારે વિરોધ પ્રદર્શનો શરૂ થયા હતા, અને તેમના વિરુદ્ધ કેસ નોંધાયો હતો.

ABVP માંથી કરાયા હાંકી
આ વિવાદ વચ્ચે અખિલ ભારતીય વિદ્યાર્થી પરિષદ (ABVP) એ પણ શિક્ષક રજનીશ ગંગવારને પોતાના સંગઠનમાંથી બહારનો રસ્તો દેખાડી દીધો છે. પ્રાપ્ત માહિતી અનુસાર, રજનીશ બરેલીના બહેડી વિસ્તારમાં ABVP ના નગર અધ્યક્ષના પદ પર હતા, પરંતુ હવે તેમને સંગઠનમાંથી હટાવી દેવામાં આવ્યા છે. તેમના સ્થાને ડો. હરિનંદન કુશવાહને નગર અધ્યક્ષ બનાવવામાં આવ્યા છે.

આમ, એક કવિતાના કારણે શિક્ષક રજનીશ ગંગવારને કાનૂની કાર્યવાહી, સામાજિક વિરોધ અને સંગઠનાત્મક પદ ગુમાવવાનો સામનો કરવો પડ્યો છે.