નવી દિલ્હી : આમ આદમી પાર્ટી (AAP)એ વિપક્ષી પક્ષોના જોડાણ ઇન્ડિયા બ્લોકની આગામી મહત્વપૂર્ણ બેઠકથી પોતાને દૂર રાખ્યા છે. પાર્ટીએ સ્પષ્ટ કર્યું છે કે તે આ બેઠકમાં ભાગ લેશે નહીં. પાર્ટીએ ઇન્ડિયા એલાયન્સથી પોતાને દૂર રાખ્યા છે. આમ આદમી પાર્ટી (AAP) ના સાંસદ સંજય સિંહે સ્પષ્ટ કર્યું છે કે તેમની પાર્ટી ઇન્ડિયા બ્લોકમાંથી બહાર છે.

સંજય સિંહે મીડિયા સાથે વાત કરતા કહ્યું કે, "ઇન્ડિયા બ્લોક લોકસભા ચૂંટણી માટે હતો. લોકસભા ચૂંટણી પછી, અમે હરિયાણા અને દિલ્હી વિધાનસભા ચૂંટણી એકલા લડ્યા. આ ઉપરાંત, અમે પંજાબ અને ગુજરાતમાં પેટાચૂંટણીઓ પણ એકલા લડ્યા. AAP હવે ઇન્ડિયા બ્લોકનો ભાગ નથી. અમારી પાર્ટી અને અરવિંદ કેજરીવાલે સ્પષ્ટ કરી દીધું છે કે અમે ઇન્ડિયા બ્લોકમાંથી બહાર છીએ."

સંસદમાં રણનીતિ અંગે તેમણે કહ્યું, "સંસદીય મુદ્દાઓ પર, અમે TMC, DMK જેવા વિરોધ પક્ષોનો ટેકો લઈએ છીએ અને તેઓ પણ અમારો ટેકો લે છે."

આપ નેતાઓ સામે એન્ફોર્સમેન્ટ ડિરેક્ટોરેટ (ED) ની તપાસ અંગે સંજય સિંહે ભાજપ પર નિશાન સાધ્યું અને કહ્યું, "ભાજપ કાયરોનો પક્ષ છે. તેઓ ફક્ત એજન્સીઓનો ઉપયોગ અમારી વિરુદ્ધ કરી શકે છે. અમે ઝૂકવાના નથી." રોબર્ટ વાડ્રાના મુદ્દા પર સંજય સિંહે કટાક્ષ કરતા કહ્યું, "ભાજપ છેલ્લા 10 વર્ષથી 'જીજાજી' ના નારા લગાવી રહી છે. જો તેઓ આટલા વર્ષોમાં કોઈ નિષ્કર્ષ પર પહોંચ્યા નથી, તો તે તેમની નિષ્ફળતા છે.