લોસ એન્જલસ, તા. ૧૯ જુલાઈ, ૨૦૨૫: અમેરિકાના લોસ એન્જલસ શહેરમાં શનિવારે વહેલી સવારે એક ભયાનક અને દર્દનાક માર્ગ અકસ્માત સર્જાયો હતો. ઇસ્ટ હોલીવુડ વિસ્તારના સેન્ટા મોનિકા બુલવર્ડ પર એક બેકાબૂ વાહન અતિ ઝડપે ભીડમાં ઘૂસી ગયું હતું, જેના કારણે ૨૦થી વધુ લોકો ઘાયલ થયા હતા અને તેમાંથી ૮ લોકોની હાલત અત્યંત ગંભીર હોવાનું જણાવાયું છે.
ન્યૂયોર્ક ટાઇમ્સના અહેવાલ મુજબ, આ ઘટના શનિવારે વહેલી સવારે બની હતી. વાહનની ગતિ એટલી બધી તેજ હતી કે ડ્રાઇવરે તેના પરનો કાબૂ ગુમાવી દીધો અને તે અચાનક રાહદારીઓની ભીડમાં ઘૂસી ગયું. લોસ એન્જલસ ફાયર ડિપાર્ટમેન્ટે આ ઘટનાની પુષ્ટિ કરી છે અને જણાવ્યું કે, ઘાયલોને તાત્કાલિક નજીકની હોસ્પિટલોમાં દાખલ કરવામાં આવ્યા છે.
ષડયંત્ર કે અકસ્માત? તપાસ શરૂ:
આ ઘટના પાછળ કોઈ ષડયંત્ર છે કે તે માત્ર એક દુર્ઘટના છે, તે અંગે હજુ સુધી સ્પષ્ટતા થઈ શકી નથી. ફાયર ડિપાર્ટમેન્ટ અને અન્ય અધિકારીઓ હાલ સમગ્ર મામલે તપાસ કરી રહ્યા છે. ઘટનાસ્થળને તાત્કાલિક ઘેરી લેવામાં આવ્યું છે અને પુરાવા એકત્રિત કરવાની કામગીરી ચાલી રહી છે.
અકસ્માતની જાણ થતાની સાથે જ ઘટનાસ્થળે અનેક એમ્બ્યુલન્સ અને કટોકટી ટીમો પહોંચી ગઈ હતી. તેમણે તાત્કાલિક ઘાયલોને પ્રાથમિક સારવાર પૂરી પાડી અને તેમને વધુ સારવાર માટે હોસ્પિટલોમાં ખસેડવાની વ્યવસ્થા કરી. આ ભયાવહ ઘટનાએ લોસ એન્જલસમાં ભારે સનસનાટી મચાવી છે અને લોકોમાં ભયનો માહોલ ફેલાવ્યો છે.