અગ્રણી ઉદ્યોગપતિ અનિલ અંબાણીની આગેવાની હેઠળની કંપની રિલાયન્સ પાવર માટે પહેલું ક્વાર્ટર ખૂબ સારું સાબિત થયું છે. કંપની દ્વારા જાહેર કરાયેલા પરિણામો પ્રમાણે પ્રથમ ક્વાર્ટરમાં ચોખ્ખો નફો રૂપિયા 44.68 કરોડ હતો. કંપનીને એક વર્ષ પહેલા સમાન ક્વાર્ટરમાં રૂપિયા 98.16 કરોડનું નુકસાન થયું હતું. કંપનીની આવક (કામગીરી) રૂપિયા 1885 કરોડ હતી.

કંપનીની આવકમાં વાર્ષિક ધોરણે 5.35%નો ઘટાડો થયો છે. અત્રે ઉલ્લેખનીય છે એક વર્ષ પહેલા આ જ ક્વાર્ટરમાં રિલાયન્સ પાવરની આવક 2025 કરોડ રૂપિયા હતી. એપ્રિલથી જૂન 2025 દરમિયાન રિલાયન્સ પાવરનો EBITDA રૂપિયા 565 કરોડ હતો.

રિલાયન્સ પાવરે જૂન ત્રિમાસિક ગાળામાં રૂપિયા 584 કરોડનું દેવું ચૂકવ્યું છે. રિલાયન્સ પાવરે તેની માહિતીમાં જણાવ્યું છે કે તેનો દેવા અને મૂડીનો ગુણોત્તર 0.43 હતો. જે ઉદ્યોગમાં સૌથી ઓછો છે. 30 જૂન, 2025 સુધીમાં કંપનીની નેટવર્થ વધીને રૂપિયા 16431 કરોડ થઈ ગઈ છે.

રિલાયન્સ પાવરનો સાસન અલ્ટ્રા મેગા પાવર પ્લાન્ટ દેશનો શ્રેષ્ઠ પ્રદર્શન કરતો પ્લાન્ટ છે. આ પ્લાન્ટની કુલ ક્ષમતા 3960 મેગાવોટ છે. તે જ સમયે, રોઝા પાવર પ્લાન્ટે તેની 1200 મેગાવોટની કાર્યકારી ક્ષમતા જાળવી રાખી છે. સમગ્ર ક્વાર્ટર દરમિયાન આ પ્લાન્ટની ઉપલબ્ધતા 97 ટકા રહી.

એક તરફ, રિલાયન્સ પાવર તેનું દેવું ચૂકવી રહ્યું છે. બીજી બાજુ કંપની નફો પણ કરી રહી છે. રિલાયન્સ પાવર પણ ભંડોળ એકત્ર કરવાની તૈયારી કરી રહ્યું છે. અનિલ અંબાણીની કંપની ઇક્વિટી અને ડેટ દ્વારા રૂપિયા 9000 કરોડ એકત્ર કરવા માંગે છે.

છેલ્લા એક વર્ષમાં રિલાયન્સ પાવરના શેરના ભાવમાં ૧૨૯ ટકાનો વધારો થયો છે. જેના કારણે પોઝિશનલ રોકાણકારોના પૈસા બમણા થઈ ગયા છે. શુક્રવારે બજાર બંધ થયું ત્યારે આ સ્ટોક રૂપિયા 64.08 ના સ્તરે હતો. રિલાયન્સ પાવરના શેરના ભાવમાં 5 વર્ષમાં 1741 ટકાનો વધારો થયો છે.