નવી દિલ્‍હી, તા.૨૧: ચાલુ નાણાકીય વર્ષના પ્રથમ ત્રિમાસિક ગાળા (એપ્રિલપ્રજૂન)માં જીએસટી અધિકારીઓએ ૧૫,૮૫૧ કરોડ રૂપિયાની જીએસટી ચોરી શોધી કાઢી છે. આ વાત નકલી ઇનપુટ ટેક્‍સ ક્રેડિટ (આઇટીસી) દાવાઓ દ્વારા શોધી કાઢવામાં આવી છે. આ ગયા નાણાકીય વર્ષના સમાન સમયગાળા કરતા ૨૯ ટકા વધુ છે. જોકે, નકલી કંપનીઓની સંખ્‍યામાં વાર્ષિક ધોરણે ઘટાડો થયો છે.

અધિકારીઓના જણાવ્‍યા અનુસાર,૩,૫૫૮ નકલી કંપનીઓ દ્વારા ૧૫,૮૫૧ કરોડ રૂપિયાની આઇટીસી છેતરપિંડીથી મેળવવામાં આવી હતી. આ સમયગાળા દરમિયાન, જીએસટી અધિકારીઓએ ૫૩ લોકોની ધરપકડ કરી અને ૬૫૯ કરોડ રૂપિયા વસૂલ કરવામાં આવ્‍યા. આ ગાળમાં ૩,૮૪૦ નકલી કંપનીઓ સાથે જોડાયેલા ૧૨,૩૦૪ કરોડ રૂપિયાના નકલી આઇટીસી શોધી કાઢયા હતા. ૫૪૯ કરોડ રૂપિયા વસૂલ કરવામાં આવ્‍યા હતા અને ૨૬ લોકોની ધરપકડ કરવામાં આવી હતી. સમગ્ર નાણાકીય વર્ષ ૨૦૨૪-૨૫ દરમિયાન, અધિકારીઓએ ૬૧,૫૪૫ કરોડ રૂપિયાના આઇટીસી છેતરપિંડીમાં સંડોવાયેલી ૨૫,૦૦૯ નકલી કંપનીઓ શોધી કાઢી હતી.

GST શાસન હેઠળ, ITC એ સપ્‍લાયર્સ પાસેથી ખરીદી પર કંપનીઓ દ્વારા ચૂકવવામાં આવતા કરમાંથી મળે છે. કર જવાબદારી ચૂકવતી વખતે આ કર ક્રેડિટ અથવા કપાત તરીકે દાવો કરી શકાય છે. નકલી ITCનો સામનો કરવો એ GST વહીવટીતંત્ર માટે એક મોટો પડકાર રહ્યો છે, કારણ કે અનૈતિક તત્‍વો ફક્‍ત ITCનો દાવો કરવા અને સરકારી તિજોરીને છેતરવા માટે નકલી કંપનીઓ બનાવે છે.

એક અધિકારીએ જણાવ્‍યું હતું કે દર મહિને સરેરાશ ૧,૨૦૦ નકલી કંપનીઓ શોધી કાઢવામાં આવી રહી છે. જો કે નકલી જીએસટી નોંધણીઓ સામેની ઝુંબેશ અસરકારક રહી છે.