તિરુવનંતપુરમ : કેરળના પૂર્વ મુખ્યમંત્રી અને સામ્યવાદી પક્ષના દિગ્ગજ નેતા વી.એસ. અચ્યુતાનંદનનું સોમવારે (21 જુલાઈ) 101 વર્ષની વયે નિધન થયું છે. તેમના નિધનથી કેરળના રાજકારણમાં શોકનો માહોલ છવાઈ ગયો છે.
 
એક મહિનાથી સારવાર હેઠળ
અચ્યુતાનંદન એક મહિના પહેલા આવેલા કાર્ડિયાક અરેસ્ટ બાદ તિરુવનંતપુરમના એક ખાનગી હોસ્પિટલમાં સારવાર લઈ રહ્યા હતા. તેમના નિધનની પુષ્ટિ ભારતીય કમ્યુનિસ્ટ પાર્ટી (માર્કસવાદી) ના રાજ્ય સચિવ એમ.વી. ગોવિંદને કરી હતી.
 
શ્રમિકોના હક અને સામાજિક ન્યાયના હિમાયતી
વી.એસ. અચ્યુતાનંદન CPI(M) ના સ્થાપક સભ્યોમાંના એક હતા અને તેમણે 2006 થી 2011 સુધી કેરળના મુખ્યમંત્રી તરીકે સેવા આપી હતી. તેઓ શ્રમિકોના હક, સામાજિક ન્યાય અને જમીન સુધારણાના પ્રખર હિમાયતી તરીકે જાણીતા હતા.

તેમને રાજ્ય વિધાનસભામાં સાત વખત ચૂંટવામાં આવ્યા હતા અને ત્રણ વખત વિરોધ પક્ષના નેતા તરીકે પણ સેવા આપી હતી. તેમનું લાંબુ રાજકીય જીવન અને લોકો માટેના તેમના યોગદાનને હંમેશા યાદ કરવામાં આવશે.