નવી દિલ્હી : સંસદના મોનસૂન સત્રનો પ્રથમ દિવસ ભારે હોબાળોભર્યો રહ્યો. 21 જુલાઈથી શરૂ થયેલા સત્રના પહેલા જ દિવસે 'ઓપરેશન સિંદૂર' અને પહલગામ આતંકી હુમલાને લઈને વિપક્ષી સાંસદોએ જોરદાર સૂત્રોચ્ચાર કર્યા, જેના કારણે લોકસભાની કાર્યવાહી બે વાર સ્થગિત કરવી પડી. વિપક્ષે સરકાર પર ગંભીર મુદ્દાઓ પર ચર્ચા ટાળવાનો આરોપ લગાવ્યો હતો, પરંતુ હવે સરકારે 'ઓપરેશન સિંદૂર' પર બહેસ માટે સંમતિ આપી દીધી છે.
 
'ઓપરેશન સિંદૂર' પર લાંબી ચર્ચાનું કન્ફર્મ!
બિઝનેસ એડવાઈઝરી કમિટીની બેઠકમાં નિર્ણય લેવામાં આવ્યો છે કે, 'ઓપરેશન સિંદૂર' પર લોકસભામાં 16 કલાક અને રાજ્યસભામાં 9 કલાક સુધી ચર્ચા થશે. આ ઓપરેશન તાજેતરમાં જમ્મુ-કાશ્મીરમાં સુરક્ષા દળો દ્વારા ચલાવવામાં આવેલ એક મહત્વપૂર્ણ લશ્કરી અભિયાન છે, જેને લઈને દેશભરમાં ભારે ચર્ચા ચાલી રહી છે.
 
અન્ય મહત્વપૂર્ણ બિલ અને મુદ્દાઓ પણ ચર્ચાશે
આ મોનસૂન સત્રમાં સંસદમાં અનેક મહત્વપૂર્ણ બિલ પર પણ ચર્ચા કરવામાં આવશે. નિર્ધારિત કાર્યક્રમ અનુસાર:
•    'ભારતીય પોસ્ટ બિલ' પર લોકસભામાં 3 કલાકની ચર્ચા થશે.
•    'આવકવેરા સુધારા બિલ' પર 12 કલાક સુધી ચર્ચાનો પ્રસ્તાવ છે.
•    'રાષ્ટ્રીય ખેલ બિલ' માટે 8 કલાકનો સમય નિર્ધારિત કરવામાં આવ્યો છે.
•    'મણિપુર બજેટ' પર 2 કલાકની ચર્ચા થશે.

આ ઉપરાંત, તેલુગુ દેશમ પાર્ટી (TDP) એ 1975ના કટોકટીની 50મી વર્ષગાંઠ પર ચર્ચાની માંગ કરી છે, જ્યારે ભાજપના સાંસદ અનુરાગ ઠાકુરે હિમાચલ પ્રદેશમાં તાજેતરના વરસાદ અને પૂરની સ્થિતિ પર ચર્ચા કરવા વિનંતી કરી છે.
 
વિપક્ષનો આક્રોશ: 'અમને બોલવા દેવામાં આવતા નથી!'
લોકસભામાં વિપક્ષના નેતા રાહુલ ગાંધીએ સરકાર પર પ્રહાર કરતા કહ્યું, “હું વિપક્ષનો નેતા છું, પરંતુ મને ગૃહમાં બોલવા દેવામાં આવતો નથી.” તેમણે આરોપ લગાવ્યો કે સરકાર લોકશાહીને દબાવી રહી છે અને ગંભીર મુદ્દાઓ પરથી ધ્યાન ભટકાવી રહી છે.
 
મોનસૂન સત્રનો સંપૂર્ણ કાર્યક્રમ
આ મોનસૂન સત્ર 21 જુલાઈથી 21 ઓગસ્ટ સુધી ચાલશે. કુલ 32 દિવસના આ સત્રમાં 21 બેઠકો પ્રસ્તાવિત છે. સ્વાતંત્ર્ય દિવસની ઉજવણી માટે સંસદની કાર્યવાહી 12 ઓગસ્ટથી 17 ઓગસ્ટ સુધી સ્થગિત રહેશે, અને 18 ઓગસ્ટે ફરીથી શરૂ થશે.