ઈસ્લામાબાદ, તા.૨૧

અમેરિકી રાષ્ટ્રપતિ ડોનાલ્ડ ટ્રમ્પે ઓપરેશન સિંદૂર દરમિયાન ભારતના પાંચ ફાઇટર પ્લેન તોડી પાડવામાં આવ્યા હોવાના દાવાએ રાજકીય વર્તુળોમાં હડકંપ મચાવ્યો છે. જોકે, પાકિસ્તાનના જાણીતા નિષ્ણાત ડૉ. મુક્તદર ખાને આ દાવાને ખોટો ઠેરવ્યો છે. તેમણે ભારતીય ચીફ ઑફ ડિફેન્સ સ્ટાફ (CDS) જનરલ અનિલ ચૌહાણના નિવેદનને સમર્થન આપતા કહ્યું કે પાકિસ્તાન દ્વારા પાંચ કે છ વિમાન તોડી પાડવાના દાવા સાચા નથી, કદાચ એક રાફેલ અને બે ફાઇટર જેટને નુકસાન થયું હશે. યુદ્ધવિરામ અંગે ડૉ. ખાને જણાવ્યું કે ભારત અમેરિકાની મધ્યસ્થી સ્વીકારતું નહોતું અને કહ્યું હતું કે જો પાકિસ્તાન હુમલા બંધ કરશે તો જ ભારત રોકાશે. તેમણે સૂચવ્યું કે જો ટ્રમ્પને નોબેલ પુરસ્કાર મળે તો ભારતને વેપારમાં ફાયદો થઈ શકે છે, તેથી ભારતે તેમને નોમિનેટ કરવા જોઈએ.

તાજેતરમાં, અમેરિકાના પૂર્વ રાષ્ટ્રપતિ ડોનાલ્ડ ટ્રમ્પે 'ઓપરેશન સિંદૂર'ના સંદર્ભમાં પાંચ ફાઇટર પ્લેન તોડી પાડવામાં આવ્યા હોવાનો દાવો કરીને એક નવો વિવાદ સર્જ્યો છે. ભલે તેમણે કોઈ ચોક્કસ દેશનું નામ લીધું ન હોય, પરંતુ તેમના આ નિવેદનથી ભારતમાં રાજકીય ગરમાવો આવ્યો છે અને વિપક્ષે સોમવાર (૨૧ જુલાઈ, ૨૦૨૫) થી શરૃ થતા ચોમાસા સત્રમાં આ મુદ્દો જોરશોરથી ઉઠાવવાની તૈયારી બતાવી છે. આ બધાની વચ્ચે, પાકિસ્તાનના એક અગ્રણી નિષ્ણાતે ભારતના પાંચ રાફેલ વિમાનો તોડી પાડવામાં આવ્યા હોવાના પાકિસ્તાનના દાવાઓને ખોટા ગણાવ્યા છે.

પાકિસ્તાની નિષ્ણાત અને પ્રોફેસર ડૉ. મુક્તદર ખાને આ મુદ્દે નિવેદન આપતા જણાવ્યું કે, તેમને લાગે છે કે ભારતના ચીફ ઑફ ડિફેન્સ સ્ટાફ જનરલ અનિલ ચૌહાણે સિંગાપોરમાં જે કહ્યું હતું કે પાકિસ્તાન દ્વારા પાંચ કે છ વિમાન તોડી પાડવાના દાવા ખોટા છે, તે સાચું હતું. ડૉ. ખાને સ્પષ્ટ કર્યું કે ભારતે પાંચ રાફેલ વિમાન ગુમાવ્યા નથી, પરંતુ કદાચ એક રાફેલ અને બે ફાઇટર જેટને નુકસાન થયું હશે. તેમણે ઉમેર્યું કે, સીડીએસ જનરલ અનિલ ચૌહાણે પોતે સ્વીકાર્યું હતું કે ૭ મેના રોજ ભારતને થોડું નુકસાન થયું હતું, જેના કારણે તેમને પોતાની રણનીતિ બદલવી પડી હતી.

ડોનાલ્ડ ટ્રમ્પના દાવા પર પ્રતિક્રિયા આપતા ડૉ. મુક્તદર ખાને કહ્યું કે, ટ્રમ્પ કદાચ પાંચ વિમાનોના નુકસાન વિશે વાત કરવા બદલ ભારતથી નારાજ છે, કારણ કે ભારત યુદ્ધવિરામમાં અમેરિકાની મધ્યસ્થી અંગેના તેમના દાવાઓને નકારી રહ્યું છે. યુદ્ધવિરામ કેવી રીતે થયો તે અંગે વિગતવાર માહિતી આપતા ડૉ. ખાને જણાવ્યું કે, તેમણે અમેરિકા, ભારત અને પાકિસ્તાન વચ્ચે થયેલી યુદ્ધવિરામ વાટાઘાટોનો ક્રમ ઘણી વખત વાંચ્યો છે. તેમાંથી તેમને લાગે છે કે અમેરિકાએ ભારતને ફોન કર્યો અને ભારતે સ્પષ્ટ કહ્યું કે જો પાકિસ્તાન હુમલા બંધ કરશે તો જ ભારત પણ બંધ કરશે. આ વાત ડૉ. એસ. જયશંકરે માર્કો રુબિયોને કહી હતી. ત્યારબાદ માર્કો રુબિયોએ પાકિસ્તાનને પૂછ્યું કે શું તેઓ રોકવા માટે તૈયાર છે, અને પાકિસ્તાને હા પાડી. આ પછી માર્કો રુબિયોએ ભારતને જાણ કરી કે પાકિસ્તાન રોકવા માટે તૈયાર છે, અને આ રીતે યુદ્ધવિરામ થયો. ડૉ. ખાને સૂચવ્યું કે જો માર્કો રુબિયો વચ્ચે વાતચીત કરાવી રહ્યા હોય, તો તેને મધ્યસ્થી કહી શકાય.