નવી દિલ્હી :ભારત અને યુનાઇટેડ કિંગડમ વચ્ચે મુક્ત વેપાર કરાર (FTA) ને કેન્દ્રીય મંત્રીમંડળે મંજૂરી આપી દીધી છે. સમાચાર એજન્સી PTI એ સૂત્રોના હવાલેથી આ માહિતી આપી છે. મંગળવાર, 22 જુલાઈ 2025 ના રોજ મંત્રીમંડળ તરફથી મંજૂરી મળ્યા બાદ, હવે 24 જુલાઈ 2025 ના રોજ લંડનમાં તેના પર હસ્તાક્ષર કરવામાં આવશે. વડા પ્રધાન નરેન્દ્રભાઈ મોદીની લંડન મુલાકાત દરમિયાન બંને દેશો વચ્ચેના આ કરાર પર મહોર લાગશે.

    પીએમ મોદી બુધવારથી બ્રિટન અને માલદીવની ચાર દિવસની મુલાકાતે જઈ રહ્યા છે. વાણિજ્ય અને ઉદ્યોગ પ્રધાન પિયુષ ગોયલ પણ તેમની સાથે રહેશે.

   બંને દેશોએ 6 મેના રોજ આ વેપાર કરાર (ભારત - યુકે FTA) પર વાટાઘાટો પૂર્ણ કરવાની જાહેરાત કરી હતી. આ કરારમાં ચામડા, જૂતા, કપડાં જેવા શ્રમ-સઘન ઉત્પાદનોની નિકાસ પરના કરને દૂર કરવાનો અને બ્રિટનથી વ્હિસ્કી અને કારની આયાત સસ્તી કરવાનો પ્રસ્તાવ છે. તેનું લક્ષ્ય 2030 સુધીમાં બંને દેશો વચ્ચેના વેપારને બમણો કરીને $120 બિલિયન કરવાનો છે.

  આ કરારમાં માલ, સેવાઓ, નવીનતા, સરકારી ખરીદી અને બૌદ્ધિક સંપદા અધિકારો જેવા વિષયોનો સમાવેશ થાય છે.

સામાન્ય રીતે બંને દેશોના વાણિજ્ય મંત્રીઓ કરાર પર હસ્તાક્ષર કરે છે. 

હસ્તાક્ષર કર્યા પછી, તેને અમલમાં મૂકવા માટે બ્રિટિશ સંસદની મંજૂરીની જરૂર પડશે.

બંને દેશોએ ડબલ કોન્ટ્રીબ્યુશન કન્વેન્શન કરાર પર વાટાઘાટો પણ પૂર્ણ કરી છે. આનાથી મર્યાદિત સમયગાળા માટે બ્રિટનમાં કામ કરતા ભારતીય વ્યાવસાયિકોને સામાજિક સુરક્ષા ભંડોળમાં ડબલ યોગદાન ચૂકવવાથી મુક્તિ મળશે. દ્વિપક્ષીય રોકાણ સંધિ (BIT) પર વાટાઘાટો હજુ પણ ચાલુ છે.

જ્યારે FTA લાગુ થશે, ત્યારે બંને દેશો મહત્તમ માલ પરની કસ્ટમ ડ્યુટી દૂર કરશે અથવા ઘટાડશે. આનાથી સેવાઓ અને રોકાણમાં વેપારને વેગ મળશે. 2024-25માં, ભારતની બ્રિટનમાં નિકાસ 12.6% વધીને $14.5 બિલિયન થઈ અને આયાત 2.3% વધીને $8.6 બિલિયન થઈ. બંને દેશો વચ્ચેનો દ્વિપક્ષીય વેપાર ૨૦૨૩-૨૪માં ૨૧.૩૪ બિલિયન ડોલર થવાનો અંદાજ છે, જે ૨૦૨૨-૨૩માં ૨૦.૩૬ બિલિયન ડોલર હતો.