કેદારનાથ તા.૨૪:  દર વર્ષે લાખો યાત્રાળુઓ ભગવાન શિવને સમર્પિત કેદારનાથ ધામની મુલાકાત લે છે. આવી સ્‍થિતિમાં યાત્રાળુઓને ઘણા મુશ્‍કેલ માર્ગોમાંથી પસાર થવું પડે છે. હવે સરકાર યાત્રાળુઓની સુવિધા માટે કેદારનાથ ધામ પહોંચવા માટે બીજો વૈકલ્‍પિક માર્ગ શોધવામાં વ્‍યસ્‍ત છે. આગામી ૪-૫ વર્ષમાં કેદારનાથ જવા માટે બે રસ્‍તા હશે.

કેન્‍દ્રીય માર્ગ અને પરિવહન મંત્રાલયે હવે કેદારનાથ ધામ જવાના માર્ગને સરળ અને સુગમ બનાવવા માટે ૭ કિલોમીટર લાંબી ટનલ બનાવવાની તૈયારી કરી છે. આ ટનલના નિર્માણ પછી ગૌરીકુંડથી કેદારનાથ ધામનું અંતર ૧૬ કિલોમીટરથી ઘટીને ૫ કિલોમીટર થઈ જશે.

ટનલ બન્‍યા પછી કેદારનાથ ધામ જવા માટે બે રસ્‍તા હશે. પહેલો ગૌરીકુંડથી રામબાડા-લિંચોલી સુધીનો ૧૬ કિલોમીટર લાંબો રસ્‍તો અને બીજો ટનલ રૂટ છે. ટનલના નિર્માણ માટે મંત્રાલયે પર્વતનો પ્રારંભિક સર્વે કર્યો છે. માહિતી અનુસાર આ ટનલ ચૌમાસીથી ઉત્તરાખંડમાં કાલીમઠ ખીણના છેલ્લા ગામ લિંચોની સુધી બનાવવામાં આવશે, જે ૬૫૬૨ ફૂટ ઉપર છે. ચૌમાસી સુધી હજુ પણ એક પાકો રસ્‍તો છે. આ પછી ૭ કિલોમીટર લાંબી ટનલ હશે, પછી તમારે ૫ કિલોમીટરનું અંતર ચાલીને કાપવું પડશે.

કેદારનાથ ધામ પહોંચવા માટે હાલમાં ગૌરીકુંડથી ૧૬ કિલોમીટર ચાલવું પડે છે. આ સમય દરમિયાન, મુસાફરોને ખચ્‍ચર ડોલી અને ઘણા ઉબડખાબડ રસ્‍તાઓનો સહારો લેવો પડે છે.