ભુનેશ્વર,તા.૨૬: ઓડિશામાં મહિલાઓ અને સગીર છોકરીઓ સામે જાતીય શોષણની ઘટનાઓએ ચિંતાજનક સ્થિતિ ઊભી કરી છે. તાજેતરમાં, કંધમાલ જિલ્લાના સરકારી છાત્રાલયોમાં રહેતી ધોરણ ૧૦ની વિદ્યાર્થિનીઓ નિયમિત આરોગ્ય તપાસ દરમિયાન ગર્ભવતી હોવાનું જાણવા મળ્યું છે. આ ઘટનાએ સમાજ અને વહીવટી તંત્રમાં ખળભળાટ મચાવી દીધો છે. આ ઉપરાંત, જાજપુર જિલ્લામાં ૧ વિદ્યાર્થિનીએ તેના પ્રોફેસર પર જાતીય સતામણીનો આરોપ લગાવ્યો છે.

પોલીસે જણાવ્યું કે કંધમાલ જિલ્લાના તુમુડીબંધ બ્લોકમાં આવેલી ૨ અલગ-અલગ સરકારી રહેણાંક કન્યા ઉચ્ચ શાળાઓના છાત્રાલયોમાં રહેતી ૨ સગીર વિદ્યાર્થિનીઓ ગર્ભવતી મળી આવી છે. આ વિદ્યાર્થિનીઓ ગયા મહિને ઉનાળાની રજાઓ પછી છાત્રાલયમાં પરત ફરી હતી. નિયમિત આરોગ્ય તપાસ દરમિયાન આ ચોંકાવનારી હકીકત સામે આવી, પોલીસે આ મામલે ૨ અલગ-અલગ ફરિયાદ નોંધી છે.

બીજી તરફ, જાજપુર જિલ્લામાં ૧ યુવતીએ તેના પ્રોફેસર પર જાતીય સતામણીનો ગંભીર આરોપ લગાવ્યો છે. રાજકીય વિજ્ઞાનના ત્રીજા વર્ષની આ સ્નાાતક વિદ્યાર્થિનીએ જણાવ્યું કે તેના વિભાગના વડાએ તેને ઘણી વખત પોતાના નિવાસસ્થાને બોલાવી હતી. ત્યાં તેને ઉચ્ચ ગ્રેડના બદલામાં શારીરિક સંબંધો બાંધવાનું કહેવામાં આવ્યું હતું. વિદ્યાર્થિનીએ ઇનકાર કરતાં પ્રોફેસરે તેના શૈક્ષણિક ગ્રેડ ઘટાડવાની ધમકી આપી. વધુમાં, ૧૬ જુલાઈના રોજ પ્રોફેસરે વિદ્યાર્થિનીને તેના બે સહાધ્યાયીઓની સામે પરીક્ષામાં નાપાસ કરવાની ધમકી આપી હતી. આ ઘટનાથી વ્યથિત થયેલી વિદ્યાર્થિનીએ પોલીસમાં ફરિયાદ નોંધાવી છે.

આ બંને ઘટનાઓએ ઓડિશામાં મહિલાઓ અને સગીર છોકરીઓની સુરક્ષા અંગે ગંભીર ચિંતા ઉભી કરી છે. સરકારી છાત્રાલયો, જે વિદ્યાર્થિનીઓ માટે સુરક્ષિત આશ્રયસ્થાન હોવા જોઈએ, ત્યાં આવી ઘટનાઓએ વહીવટની નિષ્ફળતાને ઉજાગર કરી છે. આ ઉપરાંત, શૈક્ષણિક સંસ્થાઓમાં શિક્ષકો દ્વારા સત્તાનો દુરુપયોગ એ શિક્ષણ વ્યવસ્થાની વિશ્વસનીયતા પર સવાલ ઉભો કરે છે.