હરિદ્વાર, ૨૭ જુલાઈ, ૨૦૨૫ : ઉત્તરાખંડના હરિદ્વારમાં આજે રવિવારે સવારે મોટી દુર્ઘટના બની છે. પ્રસિદ્ધ મનસા દેવી મંદિરમાં દર્શન કરવા ઉમટેલી ભીડમાં અચાનક ભાગદોડ મચી ગઈ હતી, જેના કારણે અત્યાર સુધીમાં ૬ લોકોના કરૂણ મોત થયા છે. ગઢવાલ ડિવિઝન કમિશનર વિનય શંકર પાંડેએ આ ઘટનાની પુષ્ટિ કરી છે અને જણાવ્યું છે કે મંદિરમાં શ્રદ્ધાળુઓની ભારે ભીડ એકઠી થઈ હતી.
મંદિરની સીડીઓ પર સર્જાઈ દુર્ઘટના: ભીડ અને કારણોની તપાસ
પ્રશાસનનું કહેવું છે કે રવિવાર હોવાને કારણે મંદિરમાં સામાન્ય દિવસો કરતાં ભક્તોની ભીડ વધુ હતી. સવારથી જ શ્રદ્ધાળુઓ માતાના દર્શન માટે લાંબી કતારોમાં ઉભા હતા, અને આ દરમિયાન જ આ દુર્ઘટના સર્જાઈ હતી. પ્રાથમિક માહિતી મુજબ, ભાગદોડની આ ઘટના મંદિરની સીડીઓ પર બની હતી.
ઘટનાની જાણ થતા જ સ્થાનિક પોલીસ અને વહીવટી ટીમો તાત્કાલિક ઘટનાસ્થળે પહોંચી ગઈ હતી. રાહત અને બચાવ કાર્ય યુદ્ધના ધોરણે શરૂ કરી દેવામાં આવ્યું છે. ઘાયલોને તાત્કાલિક નજીકની હોસ્પિટલોમાં ખસેડવામાં આવ્યા છે, જ્યાં તેમની સારવાર ચાલી રહી છે. ભાગદોડ પાછળના ચોક્કસ કારણની હજુ તપાસ ચાલી રહી છે. પ્રશાસન દ્વારા પરિસ્થિતિને કાબૂમાં લેવાના અને અસરગ્રસ્તોને તમામ શક્ય મદદ પૂરી પાડવાના પ્રયાસો કરવામાં આવી રહ્યા છે. આ ઘટના અંગે વધુ વિગતો મેળવવામાં આવી રહી છે.