નવી દિલ્હી, ૨૭ જુલાઈ, ૨૦૨૫ : વડાપ્રધાન નરેન્દ્ર મોદીએ આજે 'મન કી બાત' કાર્યક્રમના ૧૨૪મા એપિસોડને સંબોધિત કર્યો, જે ૨૦૧૪માં શરૂ થયો હતો. તાજેતરમાં માલદીવની યાત્રા પરથી પરત ફરેલા વડાપ્રધાન મોદીનું સંસદના ચોમાસુ સત્ર વચ્ચે આ પ્રથમ સંબોધન હતું, જેના પર સૌની નજર હતી. વડાપ્રધાને પોતાના આ સંબોધનમાં અનેક મહત્વપૂર્ણ મુદ્દાઓ પર ચર્ચા કરી.
આકાશથી લઈને ઇતિહાસ સુધી: વડાપ્રધાન મોદીના 'મન કી બાત'ના મુખ્ય અંશો
શુભાંશુ શુક્લાના વખાણ અને અવકાશ ક્ષેત્રમાં જિજ્ઞાસા:
વડાપ્રધાન મોદીએ 'મન કી બાત' કાર્યક્રમની શરૂઆત અવકાશયાત્રી શુભાંશુ શુક્લાના ઉલ્લેખ સાથે કરી. વડાપ્રધાને કહ્યું કે, "શુભાંશુ જેવા જ અવકાશમાંથી પરત ફર્યા, સમગ્ર દેશમાં ખુશીની લહેર દોડી ગઈ. આખો દેશ ગર્વથી ભરાઈ ગયો. ઓગસ્ટ ૨૦૨૩માં ચંદ્રયાન-૩ના સફળ ઉતરાણ પછી વિજ્ઞાન અને અવકાશને લઈને દેશમાં નવું વાતાવરણ બન્યું છે. તેને લઈને બાળકોમાં જિજ્ઞાસા જાગી છે. હવે નાના બાળકો પણ કહે છે કે અમે પણ સ્પેસમાં જઈશું."
'નમો ભારત' એપ પર સંદેશ મોકલવાની અપીલ:
વડાપ્રધાન મોદીએ 'ઇન્સપાયર માનક' અભિયાનનો ઉલ્લેખ કરતા કહ્યું, "તમે 'ઇન્સપાયર માનક' અભિયાનનું નામ સાંભળ્યું હશે. આમાં દરેક શાળામાંથી ૫ બાળકો પસંદ કરવામાં આવે છે અને દરેક બાળક નવો વિચાર લઈને આવે છે. ચંદ્રયાન-૩ પછી તેમની સંખ્યા બમણી થઈ ગઈ છે. સ્પેસ સેક્ટરમાં સ્ટાર્ટઅપ પણ ઝડપથી વધી રહ્યા છે. આવતા મહિને ૨૩ ઓગસ્ટે 'નેશનલ સ્પેસ ડે' છે. તમે તેને કેવી રીતે ઉજવશો? મને 'નમો ભારત' એપ પર ચોક્કસ સંદેશ મોકલજો."
૧૨ મરાઠા કિલ્લાઓનો ઉલ્લેખ અને ઇતિહાસનું મહત્વ:
'મન કી બાત' કાર્યક્રમમાં વડાપ્રધાન મોદીએ જણાવ્યું કે યુનેસ્કોએ ૧૨ મરાઠા કિલ્લાઓને વિશ્વ ધરોહરનો દરજ્જો આપ્યો છે. વડાપ્રધાને તમામ કિલ્લાઓના ઇતિહાસની સંક્ષિપ્તમાં રજૂઆત કરી. વડાપ્રધાને કહ્યું, "૧૧ કિલ્લા મહારાષ્ટ્રમાં અને ૧ કિલ્લો તમિલનાડુમાં... દરેક કિલ્લા સાથે ઇતિહાસનું એક-એક પાનું જોડાયેલું છે. દરેક પથ્થર એક ઐતિહાસિક ઘટનાનો સાક્ષી છે. હું તમામ દેશવાસીઓને આગ્રહ કરું છું કે આ કિલ્લાઓની યાત્રા કરો અને પોતાના ઇતિહાસને જાણો."
સ્વતંત્રતા સેનાની ખુદીરામ બોઝની ફાંસીનો કિસ્સો:
વડાપ્રધાન મોદીએ ક્રાંતિકારી खुदीराम बोઝને યાદ કરતા કહ્યું, "બિહારનું મુઝફ્ફરપુર શહેર, તારીખ ૧૧ ઓગસ્ટ ૧૯૦૮. લોકોની આંખોમાં આંસુ હતા અને દિલોમાં જ્વાળા. એક જેલમાં ૧૮ વર્ષનો યુવક અંગ્રેજો સામે પોતાનો દેશપ્રેમ વ્યક્ત કરવાની કિંમત ચૂકવી રહ્યો હતો. જેલની અંદર અંગ્રેજ અધિકારીઓ તેને ફાંસી આપવાની તૈયારી કરી રહ્યા હતા. તે યુવાનના ચહેરા પર ભય નહોતો, પરંતુ તે ગર્વથી ભરેલો હતો. તે વીર યુવાન હતા ખુદીરામ બોઝ."
ઑગસ્ટ મહિનાનું ખાસ મહત્વ:
વડાપ્રધાન મોદીએ જણાવ્યું કે, "ઑગસ્ટનો મહિનો ક્રાંતિનો મહિનો છે. ૧ ઑગસ્ટના રોજ લોકમાન્ય બાલગંગાધર તિલકની પુણ્યતિથિ હોય છે. ૮ ઑગસ્ટના રોજ ગાંધીજીના નેતૃત્વમાં ભારત છોડો આંદોલનની શરૂઆત થઈ હતી. ૧૫ ઑગસ્ટના રોજ સ્વતંત્રતા દિવસ ઉજવવામાં આવે છે. જોકે, આઝાદી સાથે ભાગલાની પીડા પણ જોડાયેલી છે. તેથી ૧૪ ઑગસ્ટના રોજ 'વિભાજન વિભીષિકા દિવસ' તરીકે ઉજવવામાં આવે છે. ૭ ઑગસ્ટના રોજ 'નેશનલ હેન્ડલૂમ ડે' ને પણ ૧૦ વર્ષ પૂરા થવાના છે."
આમ, વડાપ્રધાનના 'મન કી બાત'ના આ સંબોધનમાં વિજ્ઞાન, ઇતિહાસ, રાષ્ટ્રીય ગૌરવ અને ક્રાંતિના સંદેશનો સમન્વય જોવા મળ્યો હતો.