નવી દિલ્હી : મલેશિયાના વિદેશ પ્રધાન મોહમ્મદ હસને દાવો કર્યો છે કે થાઈલેન્ડ અને કંબોડિયા યુદ્ધવિરામ માટે સંમત થયા છે. બંને દેશોના ટોચના નેતાઓ સોમવારે મલેશિયા પહોંચશે અને વાતચીત કરશે. આ સંઘર્ષમાં અત્યાર સુધીમાં 30 થી વધુ લોકો માર્યા ગયા છે.

છેલ્લા ચાર દિવસથી એશિયા ખંડના બે દેશો વચ્ચે યુદ્ધ ચાલી રહ્યું હતું. જે હવે શાંત થવાની શક્યતા છે. મલેશિયાના વિદેશ પ્રધાન મોહમ્મદ હસને દાવો કર્યો છે કે થાઈલેન્ડ અને કંબોડિયાએ તેમના સરહદી સંઘર્ષને ઉકેલવા માટે મલેશિયાને મધ્યસ્થી તરીકે સ્વીકાર્યું છે. જો કે, આ દરમિયાન, બંને દેશોએ ફરીથી એકબીજા પર તોપોથી હુમલો કરવાનો આરોપ લગાવ્યો છે.

સમાચાર એજન્સી બર્નામાના જણાવ્યા અનુસાર, મલેશિયાના વિદેશ પ્રધાન હસને બર્નામાને જણાવ્યું છે કે કંબોડિયાના વડા પ્રધાન હુન માનેત અને થાઈલેન્ડના કાર્યકારી વડા પ્રધાન ફુમથમ વેચાયચાઈ સોમવારે મલેશિયા પહોંચશે અને વાતચીત કરશે.

વિદેશ પ્રધાન હસને કહ્યું, 'બંને દેશોએ મલેશિયામાં સંપૂર્ણ વિશ્વાસ વ્યક્ત કર્યો છે અને મને મધ્યસ્થીની ભૂમિકા ભજવવા કહ્યું છે. મેં થાઇલેન્ડ અને કંબોડિયાના વિદેશ પ્રધાનો સાથે વાત કરી છે અને તેમણે પણ શાંતિ વિશે વાત કરી છે અને કહ્યું છે કે આ બાબતમાં અન્ય કોઈ દેશનો હાથ ન હોવો જોઈએ.’

તમને જણાવી દઈએ કે શુક્રવારે લાઓસના વડા પ્રધાન અનવર ઇબ્રાહિમ, જે આસિયાન ફોરમના અધ્યક્ષ છે, તેમણે કંબોડિયા અને થાઇલેન્ડ વચ્ચે યુદ્ધવિરામનો પ્રસ્તાવ મૂક્યો હતો.

શનિવારે, વિશ્વના સૌથી શક્તિશાળી દેશ અમેરિકાના રાષ્ટ્રપતિ ડોનાલ્ડ ટ્રમ્પે પણ થાઇલેન્ડ અને કંબોડિયાના વડા પ્રધાનો સાથે વાત કરી હતી અને તેમને યુદ્ધવિરામનો આગ્રહ કર્યો હતો.

થાઇલેન્ડ અને કંબોડિયા વચ્ચે સરહદી સંઘર્ષ ચાર દિવસ પહેલા શરૂ થયો હતો અને અત્યાર સુધીમાં તેમાં 30 થી વધુ લોકો માર્યા ગયા છે, જેમાં બંને દેશોના નાગરિકોનો પણ સમાવેશ થાય છે. અધિકારીઓના જણાવ્યા અનુસાર, સંઘર્ષ શરૂ થયો ત્યારથી, સરહદની નજીક રહેતા બે લાખથી વધુ લોકોને સલામત સ્થળોએ મોકલવામાં આવ્યા છે.