નવી દિલ્હી :અમેરિકાના રાષ્ટ્રપતિ ડોનાલ્ડ ટ્રમ્પ વારંવાર દાવો કરી રહ્યા છે કે તેમણે ભારત અને પાકિસ્તાન વચ્ચે યુદ્ધવિરામમાં મધ્યસ્થી તરીકે ભૂમિકા ભજવી છે. જોકે, વિદેશ મંત્રી એસ. જયશંકરે ઘણી વખત અમેરિકાના રાષ્ટ્રપતિ ડોનાલ્ડ ટ્રમ્પના આ દાવાને નકારી કાઢ્યો છે. સોમવારે વિદેશ મંત્રીએ લોકસભામાં અમેરિકાના મધ્યસ્થી કરવાના દાવાઓને પણ નકારી કાઢ્યા હતા. તેમણે કહ્યું કે 22 એપ્રિલથી 17 જૂન સુધી વડાપ્રધાન નરેન્દ્રભાઈ  મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે કોઈ ફોન પર વાતચીત થઈ નથી. હવે આ મુદ્દે કોંગ્રેસના મહાસચિવ પ્રિયંકા ગાંધી વાડ્રાનું નિવેદન સામે આવ્યું છે. .

    પ્રિયંકા ગાંધીએ કહ્યું કે વિદેશ મંત્રી એસ જયશંકરે અમેરિકાની કથિત મધ્યસ્થી અંગે પરિસ્થિતિ સ્પષ્ટ કરી નથી. તેમણે લોકસભામાં વિદેશ મંત્રી દ્વારા આપવામાં આવેલા નિવેદન પર પ્રશ્નો ઉઠાવ્યા. સંસદ પરિસરમાં પત્રકારો સાથે વાત કરતા કોંગ્રેસ નેતાએ કહ્યું કે વિદેશ મંત્રીએ ઘણી બાબતો સ્પષ્ટ કરી નથી. તેમણે ફક્ત એટલું જ કહ્યું કે વડા પ્રધાન નરેન્દ્રભાઈ  મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે થોડા દિવસોથી કોઈ વાતચીત થઈ નથી, પરંતુ તેમણે મધ્યસ્થી કરવામાં અમેરિકાની ભૂમિકા શું હતી તે જણાવ્યું નથી.

અગાઉ, લોકસભામાં ઓપરેશન સિંદૂર પર ચર્ચા દરમિયાન, વિદેશ મંત્રીએ વિપક્ષના દાવાને ફગાવી દીધો હતો કે જમ્મુ અને કાશ્મીરના પહેલગામમાં થયેલા હુમલા પછી ભારતને વિદેશમાંથી પૂરતો ટેકો મળ્યો નથી. મંત્રીએ કહ્યું કે સંયુક્ત રાષ્ટ્રના 193 સભ્યોમાંથી, પાકિસ્તાન અને ત્રણ અન્ય દેશો સિવાય બધાએ ઓપરેશન સિંદૂરને ટેકો આપ્યો હતો. તેમણે કહ્યું કે સંયુક્ત રાષ્ટ્રના 193 સભ્યોમાંથી, ફક્ત પાકિસ્તાન અને તેના ત્રણ સાથીઓએ ભારતના ઓપરેશનનો વિરોધ કર્યો હતો.

આ સાથે તેમણે એ પણ સ્પષ્ટતા કરી કે ચીન દ્વારા પાકિસ્તાનને ટેકો આપવો એ કોઈ નવી વાત નથી. કોંગ્રેસના સમયથી બંને દેશોની ભાગીદારી 60 વર્ષથી ચાલી રહી છે. તેમણે એમ પણ કહ્યું કે ઓપરેશન સિંદૂર દરમિયાન અમેરિકા સાથેની વાતચીતમાં વેપારનો કોઈ ઉલ્લેખ નહોતો અને 22 એપ્રિલથી 17 જૂન દરમિયાન વડા પ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પ વચ્ચે કોઈ ફોન વાતચીત થઈ ન હતી.

આ પછી, વિદેશ મંત્રીએ કહ્યું કે ઓપરેશન સિંદૂર દરમિયાન, ઘણા દેશોએ ભારતનો સંપર્ક કર્યો હતો અને કહ્યું હતું કે પાકિસ્તાન યુદ્ધવિરામ માટે તૈયાર છે. આ પછી, ભારતે બધા દેશોને સ્પષ્ટ કર્યું કે તે પાકિસ્તાન તરફથી યુદ્ધવિરામ વાટાઘાટો પર ફક્ત ત્યારે જ વિચાર કરશે જો તે ડાયરેક્ટર જનરલ ઓફ મિલિટરી ઓપરેશન્સ (DGMO) દ્વારા આવે. તેમણે જણાવ્યું કે પાકિસ્તાન તરફથી DGMOનો ફોન આવ્યા પછી, ભારતે લશ્કરી કાર્યવાહી બંધ કરવાનું વિચાર્યું અને આ અંગે એક કરાર થયો.