નવી દિલ્હી : રવિવારે હિંડન ઍરપોર્ટ અંધાધૂંધીનું કેન્દ્ર બન્યું જ્યારે ટેકનિકલ ખામી અને પાર્કિંગ જગ્યાના અભાવ જેવા કારણોસર ત્રણ મહત્ત્વપૂર્ણ ફ્લાઇટ્સ રદ કરવામાં આવી. ઍર ઇન્ડિયા એક્સપ્રેસ અને ઇન્ડિગોની આ ફ્લાઇટ્સ રદ થવાને કારણે, કેટલાક મુસાફરોને કલાકો સુધી વિલંબ, મુશ્કેલી અને ગુસ્સાનો સામનો કરવો પડ્યો. સૌથી ભયાનક પરિસ્થિતિનો સામનો કોલકાતા જતી ઍર ઇન્ડિયા એક્સપ્રેસ ફ્લાઇટના મુસાફરોએ કર્યો, જેમણે બોર્ડિંગ પછી લગભગ એક કલાક સુધી એસી વિના વિમાનની અંદર રહેવું પડ્યું, જેના કારણે ઘણા લોકો ગૂંગળાવા લાગ્યા.  

    સોમવારે સવારે હિંડન ઍરપોર્ટ પર બોર્ડિંગ કર્યા પછી પણ ફ્લાઇટ શરૂ થઈ નથી તો હંગામો મચી ગયો હતો. કોલકાતા ફ્લાઇટના મુસાફરો નારાજ છે. સવારે પણ ફ્લાઇટ શરૂ થઈ ન હતી અને હવે બધા હંગામો કરી રહ્યા છે.

 આ મામલો રવિવારે સાંજે શરૂ થયો જ્યારે ઍર ઇન્ડિયા એક્સપ્રેસ ફ્લાઇટ નંબર IX1512 સાંજે 5 વાગ્યે કોલકાતા માટે ઉડાન ભરવાની હતી. મુસાફરો વિમાનમાં બેઠા હતા, પરંતુ ટેકનિકલ ખામીને કારણે વિમાન ઉડાન ભરી શક્યું નહીં. આ દરમિયાન મુસાફરોએ ફરિયાદ કરી હતી કે 184 સીટર વિમાનની એસી સિસ્ટમ સંપૂર્ણપણે બંધ હતી. આ ઉપરાંત, ઑપરેશન સિંદૂર પછી વાયુસેનાની નવી માર્ગદર્શિકા મુજબ વિમાનની બધી બારીઓ પણ બંધ કરી દેવામાં આવી હતી, જેના કારણે અંદરનું વાતાવરણ ભેજવાળું અને ગૂંગળામણભર્યું બની ગયું હતું.

બીજી તરફ, ઇન્ડિગો ઍરલાઇન્સને પણ તેની બે ફ્લાઇટ્સ રદ કરવી પડી હતી. અમદાવાદ જતી ફ્લાઇટ 6E2568 સાંજે 5:35 વાગ્યે અને મુંબઈ જતી ફ્લાઇટ 6E5091 સાંજે 6:00 વાગ્યે ઉડાન ભરવાની હતી. ઇન્ડિગોના પ્રવક્તાએ જણાવ્યું હતું કે આ ફ્લાઇટ્સ રદ કરવાનું કારણ હિંડન ઍરપોર્ટ પર પાર્કિંગની જગ્યાનો અભાવ હતો.

હકીકતમાં, અમદાવાદ અને મુંબઈથી મુસાફરો સાથે હિંડન આવનારા વિમાનો પાર્કિંગની જગ્યાના અભાવે અહીં ઉતરી શક્યા ન હતા, જેના કારણે અહીંથી જતી ફ્લાઇટ્સ પણ આપમેળે રદ થઈ ગઈ હતી. આ મુદ્દે ઍરપોર્ટ ડિરેક્ટર ઉમેશ યાદવનો સંપર્ક કરવાનો પ્રયાસ કરવામાં આવ્યો ત્યારે, હંમેશની જેમ, તેમનો ફોન પણ ઉપાડવામાં આવ્યો ન હતો.
મુસાફર અપૂર્વ શરદે સોશિયલ મીડિયા પ્લેટફોર્મ પર પોતાની પીડા વ્યક્ત કરી અને લખ્યું કે ફ્લાઇટ એક કલાક મોડી છે અને બોર્ડિંગ પછી એસી કામ કરી રહ્યું નથી. આ એક પ્રકારનું ટૉર્ચર છે. મુસાફરોના વધતા વિરોધ અને હોબાળા પછી, ઍરલાઇન્સે તેમને વિમાનમાંથી નીચે ઉતારી દીધા અને બસોમાં દિલ્હી ઍરપોર્ટ મોકલ્યા, જેથી ત્યાંથી તેમના માટે વૈકલ્પિક વ્યવસ્થા કરી શકાય. આ સંદર્ભમાં, ઍર ઇન્ડિયા એક્સપ્રેસના પ્રવક્તાએ કોઈપણ સત્તાવાર માહિતી શૅર કરવાનો ઇનકાર કર્યો હતો.