કોલકાતા,તા.૨૯: કોલકાતા હાઈકોર્ટે એક મહત્‍વપૂર્ણ નિર્ણય આપતા સ્‍પષ્ટ કર્યું છે કે ટ્રાફિક પોલીસને કોઈપણ નાગરિકનું ડ્રાઇવિગ લાઇસન્‍સ જપ્ત કરવાનો, સસ્‍પેન્‍ડ કરવાનો કે રદ કરવાનો અધિકાર નથી. હાઈકોર્ટે કહ્યું કે જો કોઈ વ્‍યક્‍તિ બેદરકારીથી વાહન ચલાવે છે, તો પોલીસ તેનું લાઇસન્‍સ જપ્ત કરી શકે છે પરંતુ આ ફક્‍ત પ્રારંભિક કાર્યવાહી હશે. આ પછી આ મામલો કોર્ટમાં મોકલવો જરૂરી છે. જો કોર્ટ વ્‍યક્‍તિને દોષિત ઠેરવે, તો જ લાઇસન્‍સ રદ કરવા અથવા સસ્‍પેન્‍ડ કરવા જેવી આગળની કાર્યવાહી શરૂ કરી શકાય છે. આ કાર્ય સંબંધિત લાઇસન્‍સિંગ અધિકારીને મોકલી શકાય છે. કોર્ટે કહ્યું કે જો કોઈ વ્‍યક્‍તિ પોતાનો બચાવ કરવાનો પ્રયાસ કરે છે તો પોલીસ તેને રોકી શકતા નથી.

ન્‍યાયાધીશ પાર્થ સારથી સેને જણાવ્‍યું હતું કે, લાઇસન્‍સિંગ અધિકારીને મોટર વાહન અધિનિયમ, ૧૯૮૮ ની કલમ ૨૦૬ હેઠળ ડ્રાઇવિગ લાઇસન્‍સ જપ્ત કરવાની સત્તા છે, જો તેમાં ઉલ્‍લેખિત કોઈપણ વિગતો પૂર્ણ થાય. જોકે, ડ્રાઇવર દ્વારા કરવામાં આવેલા કથિત ગુનાની નોંધ લેવા માટે આ મામલો કોર્ટમાં મોકલવો જરૂરી છે. જો કલમ ૨૦૬ ની પેટા-કલમ (૪) માં ઉલ્‍લેખિત શરતો પૂર્ણ થાય છે, તો આવી સ્‍થિતિમાં અધિકારીએ કાયદાની કલમ ૧૯ હેઠળ લાયસન્‍સને ગેરલાયક ઠેરવવા અથવા રદ કરવા માટેની કાર્યવાહી શરૂ કરવા માટે સંબંધિત લાઇસન્‍સિંગ અધિકારીને લાયસન્‍સને રીફર કરવાની જરૂર છે. તેથી, કોઈપણ લાઇસન્‍સ સસ્‍પેન્‍ડ કરવાનો, રદ કરવાનો અથવા જપ્ત કરવાનો અધિકાર ફક્‍ત તે લાઇસન્‍સિંગ અધિકારી પાસે છે જેણે તે લાઇસન્‍સ જારી કર્યું છે. આ અરજી એક પ્રેક્‍ટિસ કરતા વકીલ દ્વારા દાખલ કરવામાં આવી હતી. આ અરજી મુજબ, ટ્રાફિક વિભાગમાં કાર્યરત પ્રતિવાદી નંબર ૧૦ (ટ્રાફિક કોન્‍સ્‍ટેબલ) ની કથિત કાર્યવાહીને પડકારવામાં આવી હતી.