નવી દિલ્હી, તા. ૨૯ જુલાઈ, ૨૦૨૫: સંસદના ચોમાસુ સત્રમાં 'ઓપરેશન સિંદૂર' પર ચાલી રહેલી તીખી ચર્ચા દરમિયાન, કેન્દ્રીય ગૃહ મંત્રી અમિતભાઈ શાહે આજે લોકસભામાં સરકારનો પક્ષ રજૂ કર્યો. તેમણે પહેલગામ હુમલા બાદ સરકારની તાત્કાલિક કાર્યવાહી અને આતંકવાદ સામેની કટિબદ્ધતા પર ભાર મૂક્યો, સાથે જ કોંગ્રેસ પર પણ આકરા પ્રહારો કરીને વિપક્ષના સવાલોનો જડબાતોડ જવાબ આપ્યો.
પહેલગામ હુમલા બાદ તત્કાલ નિર્ણય અને PM મોદીની છૂટ:
અમિતભાઈ શાહે જણાવ્યું કે, 22 એપ્રિલ, 2025 ના રોજ પહેલગામમાં થયેલા દર્દનાક હુમલા (જ્યાં આતંકીઓએ ધર્મ પૂછીને 26 નિર્દોષ પ્રવાસીઓની ઘાતકી હત્યા કરી હતી) બાદ તેઓ તુરંત શ્રીનગર પહોંચી ગયા હતા. તેમણે તે ભયાવહ રાતનો ઉલ્લેખ કરતા કહ્યું કે, "તે જ રાત્રે યોજાયેલી સુરક્ષા બેઠકમાં એક મોટો અને નિર્ણાયક નિર્ણય લેવાયો: 'આતંકવાદીઓ જ્યાં પણ છુપાયા છે અને તેમને તાલીમ આપનારાઓને યોગ્ય જવાબ આપવામાં આવશે.'"
ગૃહ મંત્રીએ 30 એપ્રિલે થયેલી CCS (કેબિનેટ કમિટી ઓન સિક્યોરિટી) ની બેઠક વિશે પણ માહિતી આપી કે, વડાપ્રધાન નરેન્દ્ર મોદીએ ભારતીય સેનાઓને આતંકવાદીઓ સામે કાર્યવાહી કરવા માટે સંપૂર્ણ ઓપરેશનલ સ્વતંત્રતા આપી દીધી હતી. આ નિર્ણયે સેનાઓને પોતાની રીતે કાર્યવાહી કરવાની શક્તિ આપી, જેના પરિણામે 'ઓપરેશન સિંદૂર' સફળ બન્યું.
'ઓપરેશન સિંદૂર': આતંકી ઠેકાણાઓનો સફાયો:
અમિતભાઈ શાહે સંસદને માહિતી આપી કે, વડાપ્રધાનના નિર્ણય બાદ 7 મેના રોજ 'ઓપરેશન સિંદૂર' શરૂ કરવામાં આવ્યું. આ ઓપરેશન હેઠળ PoK (પાક-ઓક્યુપાઈડ કાશ્મીર) અને પાકિસ્તાનના બહાવલપુર અને મુરિદકે સહિત 9 આતંકી ઠેકાણાઓને સંપૂર્ણપણે ધ્વસ્ત કરી દેવામાં આવ્યા. તેમણે ગર્વભેર જણાવ્યું કે, ભારતીય સેનાના આ હુમલાઓમાં એક પણ નાગરિકનું મૃત્યુ થયું નથી, ફક્ત આતંકવાદીઓ જ માર્યા ગયા છે. ગૃહ મંત્રીએ લોકસભામાં એક પછી એક ટાર્ગેટ કરાયેલા આતંકી કેમ્પોના નામ પણ લીધા, જે ભારતીય સેનાની સચોટ અને લક્ષ્યભેદી કાર્યવાહી દર્શાવે છે.
કોંગ્રેસ પર પ્રહાર: 'બ્લન્ડર' સુધાર્યું અને રાજનીતિનો જવાબ:
આતંકવાદ જેવા સંવેદનશીલ મુદ્દા પર પણ રાજનીતિ કરવા બદલ અમિતભાઈ શાહે કોંગ્રેસ પર નિશાન સાધ્યું. તેમણે કહ્યું કે, તેમની સરકારે કોંગ્રેસના "બ્લન્ડર" ગણાતી સિંધુ જળ સંધિ (Indus Waters Treaty) ને સ્થગિત કરીને સુધારી છે. આ સંધિ વર્ષોથી વિવાદનો મુદ્દો રહી છે, અને શાહે તેને સુધારીને સરકારે લીધેલા કડક પગલાં પર ભાર મૂક્યો.
તેમણે PM મોદીના બિહાર પ્રવાસ પર કોંગ્રેસ દ્વારા કરાયેલા કટાક્ષનો પણ જવાબ આપ્યો. અમિતભાઈ શાહે કહ્યું કે, PM મોદીનું બિહારમાં આપેલું ભાષણ ચૂંટણી ભાષણ નહોતું, પરંતુ તે દેશના 140 કરોડ લોકોની ભાવનાઓનું પ્રતિબિંબ હતું. તેમણે PM મોદીના બિહારમાં આપેલા ભાષણના કેટલાક અંશો વાંચી સંભળાવ્યા અને કટાક્ષ કરતા કહ્યું કે, "જો કોઈને આમાં ચૂંટણી ભાષણ દેખાય છે, તો તેની સમજ પર પ્રશ્નાર્થ ચિહ્ન લાગે છે. જેમ ચશ્મા હોય છે, તેવું જ દેખાય છે."
આ સાથે, ગૃહ મંત્રીએ સ્પષ્ટ કર્યું કે સરકાર આતંકવાદ સામે કોઈ સમાધાન કરવા તૈયાર નથી અને દેશની સુરક્ષા માટે કોઈ પણ હદ સુધી જવા માટે કટિબદ્ધ છે.