નવી દિલ્હી, તા. ૨૯ જુલાઈ, ૨૦૨૫: સંસદના ચોમાસુ સત્રમાં 'ઓપરેશન સિંદૂર' પર ચાલી રહેલી તીખી ચર્ચા દરમિયાન, કેન્દ્રીય ગૃહ મંત્રી અમિતભાઈ શાહે આજે લોકસભામાં 'ઓપરેશન મહાદેવ' અંગે વિસ્તૃત માહિતી આપી. તેમણે પહેલગામમાં નિર્દોષ નાગરિકોની નિર્મમ હત્યાની સખત નિંદા કરી અને ભારપૂર્વક જણાવ્યું કે, આ જઘન્ય હુમલામાં સામેલ ત્રણેય આતંકવાદીઓને ઠાર કરી દેવામાં આવ્યા છે.
'ઓપરેશન મહાદેવ': આતંકીઓનો ખાતમો અને પુરાવાઓથી પુષ્ટિ
ગૃહ મંત્રી અમિતભાઈ શાહે 'ઓપરેશન મહાદેવ'ની વિગતો આપતા જણાવ્યું કે, "કાલના ઓપરેશનમાં ત્રણેય આતંકવાદીઓ - સુલેમાન, અફઘાન અને જીબ્રાન - માર્યા ગયા." તેમણે વધુમાં જણાવ્યું કે, આ આતંકવાદીઓને જે લોકો ખોરાક પૂરો પાડતા હતા અને તેમને આશ્રય આપતા હતા, તેમને અગાઉથી જ NIA (નેશનલ ઇન્વેસ્ટિગેશન એજન્સી) દ્વારા હિરાસતમાં લેવામાં આવ્યા હતા.
આતંકવાદીઓના મૃતદેહો શ્રીનગર લાવવામાં આવ્યા ત્યારે, હિરાસતમાં લેવાયેલા લોકો દ્વારા તેમની ઓળખ કરવામાં આવી. અમિતભાઈ શાહે ભારપૂર્વક કહ્યું કે, "પહેલગામમાં ધર્મ પૂછીને નિર્દોષ લોકોને મારનારા ત્રણેય આતંકવાદીઓને ઠાર કરી દેવાયા છે. ચાર લોકોએ આ આતંકીઓની ઓળખ કરી, જેના પછી તેમને મારી નાખવામાં આવ્યા."
આ ઉપરાંત, તેમણે ફોરેન્સિક પુરાવાઓની પણ વિસ્તૃત વિગતો આપી. આતંકીઓ પાસેથી મળી આવેલા કારતૂસોની FSL (ફોરેન્સિક સાયન્સ લેબોરેટરી) રિપોર્ટ દ્વારા પુષ્ટિ થઈ કે આ જ લોકોએ પહેલગામમાં નિર્દોષ નાગરિકો પર હુમલો કર્યો હતો. ગૃહ મંત્રીએ માહિતી આપી કે, "ગઈકાલે ત્રણેય આતંકવાદીઓની રાઈફલો જપ્ત કરવામાં આવી અને FSL રિપોર્ટ સાથે તેમનો મેળવવામાં આવ્યો. ગઈકાલે ચંડીગઢમાં વધુ તપાસ કરવામાં આવી, ત્યાર પછી પુષ્ટિ થઈ કે આ ત્રણેય એ જ હતા જેમણે આતંકી હુમલો કર્યો હતો."
આ 'ઓપરેશન મહાદેવ' ભારતીય સેના, CRPF (સેન્ટ્રલ રિઝર્વ પોલીસ ફોર્સ) અને જમ્મુ-કાશ્મીર પોલીસના સંયુક્ત પ્રયાસનું પરિણામ હતું, જેના માટે અમિતભાઈ શાહે તમામને અભિનંદન પાઠવ્યા.
વિપક્ષ પર અમિતભાઈ શાહનો કટાક્ષ:
લોકસભામાં સંબોધન દરમિયાન અમિતભાઈ શાહે આતંકવાદ જેવા સંવેદનશીલ મુદ્દે વિપક્ષના વલણ પર કટાક્ષ પણ કર્યો. તેમણે કહ્યું, "મને અપેક્ષા હતી કે જ્યારે તેઓ પહેલગામના આતંકવાદીઓના માર્યા જવાની ખબર સાંભળશે તો ખુશ થશે, પરંતુ એવું લાગે છે કે તેઓ તેનાથી ખુશ નથી." આ નિવેદન દ્વારા તેમણે આતંકવાદ સામેની લડાઈમાં વિપક્ષના વલણ પર પ્રશ્નાર્થ ચિહ્ન મૂકી રાજકીય ટોણો માર્યો હતો.