સિએટલ 29 જુલાઈ, 2025: અમેરિકામાં ગુનાહિત પ્રવૃત્તિઓમાં સંડોવાયેલા એક ભારતીય નાગરિકની ધરપકડ કરવામાં આવી છે, જેના પર લૂંટ, ચોરી અને દારૂ પીને ગાડી ચલાવવા (DUI) સહિતના ગંભીર ગુનાઓના આરોપ છે. 25 વર્ષીય મનજોત સિંહ નામનો આ યુવાન હવે યુએસ ઇમિગ્રેશન એન્ડ કસ્ટમ્સ એન્ફોર્સમેન્ટ (ICE)ની કસ્ટડીમાં છે અને તેના દેશનિકાલ (deportation)ની કાર્યવાહી ચાલી રહી છે.
 
ગુનાઓનો સિલસિલો અને ICEની કાર્યવાહી
ICE દ્વારા પુષ્ટિ કરવામાં આવી છે કે મનજોત સિંહને આ મહિનાની શરૂઆતમાં સિએટલ વિસ્તારમાં ICE એન્ફોર્સમેન્ટ એન્ડ રિમૂવલ ઓપરેશન્સ સિએટલ, હોમલેન્ડ સિક્યોરિટી ઇન્વેસ્ટિગેશન્સ સિએટલ અને યુએસ બોર્ડર પેટ્રોલના બ્લેઇન સેક્ટર દ્વારા એક સંયુક્ત ઓપરેશન દરમિયાન ધરપકડ કરવામાં આવી હતી.

ICEના જણાવ્યા અનુસાર, મનજોત સિંહની સ્થાનિક પોલીસ દ્વારા ઓછામાં ઓછી 6 વખત ધરપકડ કરવામાં આવી હતી. તેના ગુનાહિત ઇતિહાસમાં લૂંટ, ચોરી, હુમલો, ગુનાહિત નકલ (criminal impersonation) અને દારૂ પીને વાહન ચલાવવા (DUI) જેવા આરોપો શામેલ છે. ICEએ જણાવ્યું કે સિંહ ગેરકાયદેસર રીતે અમેરિકામાં પ્રવેશ્યો હતો, જોકે તે ક્યારે અને કેવી રીતે આવ્યો તે અંગે વધુ વિગતો આપવામાં આવી નથી.
 
ટ્રમ્પ પ્રશાસનની પ્રાથમિકતા અને 'સેન્ચ્યુરી સિટી' નીતિઓ પર ચિંતા
અધિકારીઓએ જણાવ્યું કે સિંહનો કેસ ટ્રમ્પ પ્રશાસનના એ વ્યાપક પ્રયાસનો એક ભાગ છે જેમાં ગુનાહિત રેકોર્ડ ધરાવતા અનધિકૃત ઇમિગ્રન્ટ્સને દેશમાંથી દૂર કરવાને પ્રાથમિકતા આપવામાં આવી રહી છે. ICE આવા વ્યક્તિઓને "સૌથી ખરાબ ગુનેગારો" તરીકે વર્ણવે છે, જોકે તેઓ એ પણ નોંધે છે કે અમલીકરણની કાર્યવાહીના ભાગરૂપે ગુનેગાર ન હોય તેવા લોકોને પણ કસ્ટડીમાં લઈ શકાય છે.

સત્તાવાળાઓએ સિએટલ જેવા સ્થળોએ "સેન્ચ્યુરી" સિટી નીતિઓ અંગે પણ ચિંતા વ્યક્ત કરી છે. તેમનું કહેવું છે કે આ નીતિઓએ સિંહને અગાઉના ગુનાઓ માટે કાયદાકીય પરિણામોથી બચવામાં અને સમાજમાં રહેવામાં મદદ કરી હતી. ICE અને યુ.એસ. બોર્ડર પેટ્રોલ અધિકારીઓએ સિંહની ધરપકડને અન્ય લોકો માટે એક સંદેશ ગણાવ્યો છે જેઓ કાયદેસરની સ્થિતિ વિના યુ.એસ.માં રહીને ગુનાઓ આચરે છે.

નોંધનીય છે કે મનજોત સિંહ 2025માં યુએસ સત્તાવાળાઓ દ્વારા ધરપકડ કરાયેલા અનેક ભારતીય નાગરિકોમાંથી એક છે. આ ઘટના વિદેશમાં વસતા ભારતીયો માટે કાયદાનું પાલન કરવાનું મહત્ત્વ ફરી એકવાર ઉજાગર કરે છે.