સાન ફ્રાન્સિસ્કો ઇન્ટરનેશનલ એરપોર્ટ પર સોમવારે એક ચોંકાવનારી ઘટના બની, જ્યાં ડેલ્ટા એરલાઇન્સની ફ્લાઇટ ઉતર્યાના માત્ર 10 મિનિટ પછી જ કો-પાઇલટની સીધી કોકપીટમાંથી ધરપકડ કરવામાં આવતા ભારે હંગામો મચી ગયો. આ દ્રશ્ય જોઈને એરપોર્ટ પર હાજર લોકો અને ઉતરવાની તૈયારી કરી રહેલા મુસાફરો પણ આઘાતમાં સરી પડ્યા હતા.
 
કોકપીટમાં પોલીસનો દરોડો: 34 વર્ષીય પાઇલટ રુસ્તમ ભગવાગરની ધરપકડ
મિનિયાપોલિસથી આવેલી ડેલ્ટા ફ્લાઇટ 2809 (બોઇંગ 757-300) ના કો-પાઇલટ, 34 વર્ષીય રુસ્તમ ભગવાગરને બાળકોના જાતીય શોષણના ગંભીર આરોપસર કસ્ટડીમાં લેવામાં આવ્યો છે. કોન્ટ્રા કોસ્ટા કાઉન્ટી શેરિફ વિભાગના અધિકારીઓ અને હોમલેન્ડ સિક્યુરિટી ઇન્વેસ્ટિગેશનના એજન્ટોએ વિમાન ઉતરતાની સાથે જ કોકપીટ પર દરોડો પાડીને તેની ધરપકડ કરી હતી. યુએસએ ટુડેના અહેવાલ મુજબ, મુસાફરો જ્યારે વિમાનમાંથી ઉતરવાની તૈયારી કરી રહ્યા હતા, ત્યારે સશસ્ત્ર પોલીસ એજન્ટો સીધા કોકપીટમાં પહોંચ્યા અને આરોપી કો-પાઇલટને પકડી લીધો.

પોલીસે જણાવ્યું હતું કે આરોપી કો-પાઇલટ બાળકો સાથે 'રાક્ષસ જેવું ક્રૂર વર્તન' કરતો હતો. ધરપકડ વિશે પાઇલટને અગાઉથી જાણ કરવામાં આવી ન હતી, કારણ કે એજન્ટો તેને ભાગવાની કોઈ તક આપ્યા વિના પકડવા માંગતા હતા.
 
ગંભીર આરોપો અને ડેલ્ટા એરલાઇન્સની પ્રતિક્રિયા
કોન્ટ્રા કોસ્ટા શેરિફની ફેસબુક પોસ્ટ મુજબ, પોલીસનું ઇન્ટેલિજન્સ યુનિટ એપ્રિલ 2025 થી એક બાળક સામે જાતીય ગુનાઓની ફરિયાદ મળ્યા બાદ આરોપીને શોધી રહ્યું હતું. પૂરતા પુરાવા મળતા જ, શંકાસ્પદ પાઇલટ માટે ધરપકડ વોરંટ જારી કરવામાં આવ્યું હતું.

આરોપો અનુસાર, આ વર્ષે એક સગીર છોકરી પાસેથી ઓરલ સેક્સ કરવા બદલ તેની ધરપકડ કરવામાં આવી હતી, અને આરોપીએ તેની સાથે ઘણી વખત આવું કૃત્ય કર્યું હતું. પોલીસ એ પણ જાણવાનો પ્રયાસ કરી રહી છે કે રુસ્તમે અન્ય કેટલાક બાળકો સાથે પણ આવા ખોટા કામ કર્યા છે કે નહીં.

ડેલ્ટા એરલાઇન્સ કંપનીએ આ ઘટના પર પ્રતિક્રિયા આપતા કહ્યું કે, "અમે એવા વ્યક્તિને અમારા સ્ટાફમાં રાખી શકીએ નહીં જેના પર બાળકોનું જાતીય શોષણ કરવાનો આરોપ છે. ડેલ્ટા ગેરકાયદેસર વર્તનને બિલકુલ સહન કરતું નથી અને કાયદા અમલીકરણને સંપૂર્ણ સહકાર આપશે. ધરપકડ સંબંધિત આરોપોના સમાચારથી અમને આઘાત લાગ્યો છે અને તપાસ પૂર્ણ થાય ત્યાં સુધી આરોપીને સસ્પેન્ડ કરવામાં આવ્યો છે."

આરોપી રુસ્તમ ભગવાગર હાલમાં માર્ટિનેઝ ડિટેન્શન ફેસિલિટીમાં બંધ છે અને તેની જામીન રકમ $5 મિલિયન (લગભગ ₹41 કરોડ) નક્કી કરવામાં આવી છે. જો તે દોષિત ઠરશે, તો એરલાઇન તેને બરતરફ કરશે અને આરોપીને વર્ષો સુધી જેલમાં સખત કેદ ભોગવવી પડશે.

આ ઘટનાએ એરલાઇન ઉદ્યોગ અને જાહેર સલામતી બંને પર ગંભીર સવાલો ઉભા કર્યા છે.