નવી દિલ્હી :મંગળવારે લોકસભામાં પોતાના સંબોધન દરમિયાન વડા પ્રધાન નરેન્દ્ર મોદીએ કોંગ્રેસ પર જોરદાર નિશાન સાધ્યું હતું. શશિ થરૂર અને મનીષ તિવારી જેવા નેતાઓને ઓપરેશન સિંદૂર પર ચર્ચામાં ભાગ ન લેવા દેવા બદલ તેમની ટીકા કરતા પીએમ મોદીએ કહ્યું કે કોંગ્રેસના મોટા નેતાઓને ખરાબ લાગી રહ્યું છે કે આ નેતાઓએ ભારતનો પક્ષ દુનિયા સમક્ષ રજૂ કર્યો. પીએમ મોદીએ ઓપરેશન સિંદૂર પર પાકિસ્તાનનો પર્દાફાશ કરવા માટે મોકલવામાં આવેલા પ્રતિનિધિમંડળને પણ અભિનંદન આપ્યા

    સંસદમાં પોતાનું નિવેદન પૂરું કરતા પહેલા પીએમ મોદીએ કહ્યું કે કોંગ્રેસ પાર્ટીએ કેટલાક નેતાઓને ગૃહમાં બોલવા પર પ્રતિબંધ મૂક્યો છે. પીએમ મોદીએ કહ્યું, "મને આ વાતનું દુઃખ છે. મને પણ આશ્ચર્ય થયું છે. જે લોકો પોતાને કોંગ્રેસના મોટા નેતા માને છે તેઓને પેટમાં દુખાવો થઈ રહ્યો છે કે ભારતનો પક્ષ દુનિયા સમક્ષ કેમ રજૂ કરવામાં આવ્યો." પીએમ મોદીએ આગળ કહ્યું, "કદાચ કેટલાક નેતાઓને ગૃહમાં બોલવા પર પ્રતિબંધ મૂકવામાં આવ્યો છે. આ માનસિકતામાંથી બહાર નીકળવાની જરૂર છે." પીએમની આ ટિપ્પણી દરમિયાન શશિ થરૂર હસતા જોવા મળ્યા.

     નોંધનીય છે કે કોંગ્રેસના દિગ્ગજ નેતા શશી થરૂર અને મનીષ તિવારી બંને ભારત સરકાર દ્વારા વિદેશ મોકલવામાં આવેલા પ્રતિનિધિમંડળનો ભાગ હતા. થરૂરે ઓપરેશન સિંદૂર અને આતંકવાદ પર ભારતનો વલણ રજૂ કરવા માટે અમેરિકા અને ચાર અન્ય દેશોમાં ગયેલા સાત બહુપક્ષીય પ્રતિનિધિમંડળમાંથી એકનું નેતૃત્વ કર્યું હતું. મનીષ તિવારી આવા જ એક પ્રતિનિધિમંડળના સભ્ય હતા. આ બંને નેતાઓએ સંસદમાં ઓપરેશન સિંદૂર પર ચર્ચામાં ભાગ લીધો ન હતો, ત્યારબાદ આ નેતાઓ અને કોંગ્રેસ પાર્ટી વચ્ચેના અણબનાવના સમાચાર વધુ વેગ પકડ્યો છે

   આ પહેલા, સોમવારે લોકસભામાં ચર્ચા શરૂ થાય તે પહેલાં જ્યારે કોંગ્રેસના સાંસદ શશી થરૂરને આ વિષય પર પ્રશ્નો પૂછવામાં આવ્યા હતા, ત્યારે તેમણે ખૂબ જ અનોખા જવાબ આપ્યા હતા. શશી થરૂરે મીડિયાને કહ્યું હતું કે, "આ એક મૌન ઉપવાસ છે." આ પછી, તેઓ હસતાં હસતાં ચાલ્યા ગયા. તમને જણાવી દઈએ કે ભારતીય પ્રતિનિધિમંડળનો ભાગ રહેલા થરૂરે પાર્ટીના વિરોધ છતાં ઘણી વખત કેન્દ્રમાં સત્તાધારી ભાજપ સરકારના નેતૃત્વની પ્રશંસા કરી છે. પાર્ટી સાથે તેમના મતભેદોના સમાચાર પણ સામે આવ્યા છે